Diibmá vuddjojedje 514 bohcco togii. Dán jagi leat juo guhtta bohcco vuddjon. Bane Nor háliida eambbo gulahallama boazodoaluin vai lohku ii šat lassán.
Badjel 200 bohcco leat vuddjon togii Nordlánddabánas daid maŋemuš vahkkuid. Dat lea maid dagahan ahte ovcci goaskima leat vuddjon, go ledje ráppiid čuoggume.
Bane Nor guovlludirektevra Thor Brækkan lohká NRK:i ahte lea dohkketmeahttun dilli. Diimmá vuojáhallamat mákse badjelaš vihtta miljovnna.
– Okta čoavddus unnidit ealuid
Jagi 2017 álggus bivddii Bane Nor Norgga Luonddudutkaninstituhta (NINA) ohcat eanet dieđuid Nordlánddabána dili birra.
– Raporttas leat golbma čovdosa. Okta lea unnidit boazologu, nubbi lea vuolidit leahtu, ja goalmmát lea cegget áiddiid, lohká Brækkan.
Ceggejit áiddi
Eai leat 2010 rájes vuddjon eambbo bohccot go diibmá. Dalle vuddjojedje 600 bohcco. Muhtun sajiin leat juo áidi ceggejuvvon, ja dál álget vel eambbo cegget. Vuosttažettiin Mussira ja Kvalfors gaskka.
– Leat ceggen 21 kilomehtera áiddi, ja álgit vel eambbo cegget, lohká guovlludirektevra Thor Brækkan.
(©NTB)
