Láhppoluobbala giláža ássit oaivvildit dálá dili leat váidalahttin go Vefas ii buvtte doapparkontainera no mo ovddit jagiid. Lagamus ruskavuostáváldinbáiki lea Guovdageainnus.
Láhppoluobbala giláža ássit oaivvildit dálá dili leat váidalahttin go Vefas ii buvtte doapparkontainera no mo ovddit jagiid. Lagamus ruskavuostáváldinbáiki lea Guovdageainnus.
Dán jagi rájes fertejit Láhppoluobbala gili ássit eará ládje bargat jus háliidit bálkestit stuorra ruskkaid, nu go TV, galmmihanskábiid, dakkár ruskkaid mat eai čága dábálaš ruskavovnnaide mat leat juohke viesu luhtte ja man ovddas juohkehaš máksá.
Láhppoluobbala ássit leat duhtameahttumat go Vefas fitnodat, mas lea ovddasvástádus viežžat ruskkaid, lea rievdadan iežaset rutiinnaid.
– Mii, geat orrut boaittobealde, dáppe guhkkin, eat ge dušše mii Láhppoluobbalis, muhto Šuošjávrris, Suonjus, maid šaddet guhkes mátkkiid vuodjit doalvut daid ruskkaid dohko. Dat maid máksá. Eai buohkain ge leat heivvolaš biillat, čilge Láhppoluobbala gilisearvvi ovdaolmmoš Kirsten Susanne Logje.
Dát lea vuosttaš jahki go Vefas ii buvtte šat doapparkontainera Láhppoluobbalii. Doapparkontainer dolvojuvvui dábálaččat guovtte gearddi jahkái, ja olbmuin lei dalle vejolašvuohta čorget iežaset šiljuid, áittiid ja nu ain.
Eai vástidan
Gilisearvvis lohket geahččalan njulget ášši dalán go gulle ahte Vefas ii buvtte šat doapparkontainera, muhto baicce fállá olbmuide buktit stuorra ruskkaid gitta ruskavuostáváldinbáikái mii lea Guovdageainnu márkanbáikkis.
– Gilisearvi lea sádden e-boastta, ohcama Vefasii. Dan eai leat vástidan. Ii leat gullon mihkkege doppe, lohká Logje.
Seammá ohcama lei Máze gilisearvi sádden. Ávvir čálii dan birra miessemánu 14. beaivvi. Dalle Vefas rievdadii oainnus ja galggai ge doalvut Mázii doapparkontainera seammá ládje go ovddit jagiid.
Prinsihppa
Kirsten Susanne Logje meidne Láhppoluobbala gili ássit eai leat seamma dilis dan oktavuođas go Guovdageainnu márkana ássit. Danin lohká dán leat prinsihppaáššin.
– Manin mii galgat golahit eambbo go dat geat orrot márkanis ja besset doalvulit moadde mehtera báikái, jearaha son. Dasa ge lasiha:
– Go lea fálaldat olbmuide, galgá seamma fálaldat. Ii galgga midjiide máksit eambbo go daidda geat orrot guovddáš báikkis.
Báberlihppu
Ođđa vuogi mielde juohkehaš gii ássá doaresbeale báikkis, sáhttá nuvttá buktit stuorra ruskkaid, dása oažžu vissis meari báberlihpuid.
– Dat gal lea mearri galle báberlihpu oažžu, ja jus šaddá guovtte geardde doalvut, de mannet njeallje lihpu. Dat váldet guokte lihpu hávális jus stuorra biillain buktá ruskkaid.
Ballet nuoskiduvvot
– Dat mii sáhttá šaddat, in dieđe gal sihkkarit, muhto olbmot eai oba ge doalvvo ruskkaid. Ii buohkain leat vejolašvuohta. Sii geain lea fievru gal dieđus sáhttet doalvut.
Kirsten Susanne Logje lohká oallugat gilážis váillahit doapparkontainera go lei hui vuogas ja buorre fálaldat.
– Lei hirbmat buorre. Mii váillahit dieđus buohkat dáppe. Moadde beaivvi lea leamaš dáppe kontainer. De vižžet moadde beaivvi geahčen go dievvá. Mii ge diehtit ovdal ahte duon dáhtona buktet kontainera, ráhkkanišgoahtit dasa ovdal go jo buktet dan. Seammá ládje čakčat. Lea leamaš hui buorre go besset čorget. Eai ge lean golut. Vuogas ge lei, loahpaha Logje.
Vefas fitnodaga hálddahusjođiheaddji lea luomus go Ávvir váldá Vefasiin oktavuođa. Fitnodaga bargi lohká jođiheaddji barggus fas boahtte vahku rájes.
