Mii leat máŋggas geain leat ollu jurdagat dál válggaid áigge. Mii galggašeimmet buohkat, sihke nuorat ja boarrásat, geavahit iežamet jienastanvuoigatvuođa ja searvat válljejupmái. Dan dihte go riikka álbmogat ja stivrejumit, dat han leat Ipmil Áhči ásahusat, nu han mii leat oahppan Ipmil sánis.
Mun lean dál odne lohkan Ávvir aviissa ja oaidnán fiinna gova min otná Guovdageainnu listonjunnošiin ja lean logadan sin oaiviliid. Dat leat hui buorit dán rádjái, muhto risttalašvuođa árvvuid leat eatnasat guođđán dahje vajálduhttán vaikko buohkat leat bajásšaddan Ipmila sáni oahpuin ja min oskudovddasteami Luthera uhca Katekismusiin.
Mun lean gal dál dego veaháš suorganan ja skurtnjagan, muhto lean mun gal dego veaháš njuorrasan maid, go oainnán din gova. Nuorra čeahpes politihkkárat geat áigot návccaid bidjat Guovdageainnu suohkana ovddideapmái. Mun háliidan váimmustan muittuhit didjiide ráhkis politihkkárat ja ovddasteaddjit, dis dat han lea stuora fápmu, dis lea hui ollu dál din duohken movt min suohkana dilli šaddá láhččojuvvot, hábmejuvvot ja stivrejuvvot ođđa áigodagas.
Dat eai leat stohkosat, muhto áibbas duođalaš ja dehálaš doaimmat, állet fal guođe állet ge vajálduhte risttálašvuođa árvvuid ja nana vuođu, mii lea Ipmil bassi sáni duohtavuođa oahppu.
Johttisápmelaččaid listtus dat gal lei dat oassi namuhuvvon oanehaččat, ja dat gal liggii mu galbma váimmu, ja mun ožžon dakkár rohkadallanvuoiŋŋa, ja lean rohkadallan Ipmeláhči ja Jesusa nammii atte min politihkkáriidda movtta ja nanu jurdagiid ja buori iešdovddu, vuoiggalašvuođa ja ovttamielalašvuođa ja buori ovttasbarggu. Ja buot dan maid sii dárbbašit, vai sii besset oadjebasvuođain ja ráfiin doaibmat ja hábmet min suohkana dárbbuid ja ássama daid rievttes vugiid mielde, Ipmil sáni vuođu ala, de lihkostuvvet áigumušat, dárbbut ja barggut vuhtiiváldit buohkaid, buot ásahusain ja dilálašvuođain min suohkanis, Guovdageainnus.
Mii sávvat buori válljejumi.
Anne M. T. Gaup
