Biebmobearráigeahčču ávžžuha olbmuid leat áicilin ja fuolalažžan bohccuid lahka ja dieđihit eaiggádii jus oidnet bohccuid mat gillájit.
Romssa ja Finnmárkku boazodoalu heahtegearggusvuođalávdegoddi lea julggaštan ahte osiin sis-Finnmárkkus ja osiin sis-Romssas lea guohtunkriisa gassa muohttaga ja maid jikŋon guohtumiid geažil. Nordlánddas lea heahtegearggusvuođalávdegoddi julggaštan ahte siseatnamis ja váriin lea guohtunkriisa.
Biebmobearráigeahčču čállá ahte dilli lea dál nu heitot ahte bohccot eai birge dušše luonddu guohtumiin, ja ahte bohccot vázzet eambbo ohcan dihte borramuša.
– Bohccot sáhttet ihttit báikkiide gos dábálaččat eai guođo dálvet, danne ávžžuhit ge mii beanaeaiggádiid veaddit beatnagiid vai eai dárbbašmeahttumit muosehuhte bohccuid mat leat guohtumen, čállá Biebmobearráigeahčču preassadieđáhusas.
Bagadallamiin ja rávvemiin
Biebmobearráigeahčču veahkeha ealáhusa bagadallamiin ja rávvemiin, ja jus boazoeaiggádiin leat gažaldagat Biebmobearráigehččui, dahje lea dárbu hupmat singuin de sii ávžžuhit váldit oktavuođa.
– Ollu orohagain lea dál hui heajos ealát ja mii vásihit ahte ealáhus lea árrat bidjan johtui doaibmabijuid fuolahan dihte elliidčálggu. Dat doaibmabijut mat dál leat áigeguovdilat lea lassibiebman ja maid eambbo guođoheapmi go de lea vejolaš fuobmát heittot bohccuid árabut, dadjá Biebmobearráigeahču Finnmárkku ossodathoavda Siv June Hansen preassadieđáhusas.
– Váldde oktavuođa ja dieđit
Boazodoalu heahtegearggusvuođalávdegoddi lea vuođđuduvvon nannen dihte boazodoallofágalaš ja elliidčálggu gelbbolašvuođa gearggusvuođabarggus boazodoalus. Lávdegottis leat sihke fylkkamánni, boazodoalu ja maid Biebmobearráigeahču ovddasteaddjit.
– Jus oainnát bohccuid mat gillájit, váldde oktavuođa báikkálaš boazodolliiguin dahje jus it dieđe gii eaiggát lea de sáhtát maid váldit oktavuođa Biebmobearráigeahčun, čállá Biebmobearráigeahčču preassadieđáhusas.
