Kárášjoga politiijat leat maŋemuš áiggiid ožžon cavgilemiid ovtta vilges gálvobiilla birra mii lea vuodján guovtti guvlui Suomageainnus ja Kárášjoga márkanbáikki.
Kárášjoga politiijat leat maŋemuš áiggiid ožžon cavgilemiid ovtta vilges gálvobiilla birra mii lea vuodján guovtti guvlui Suomageainnus ja Kárášjoga márkanbáikki.
Kárašjoga leansmánne Kjell Magne Grønnli muitala sii leat ožžon ollu cavgilemiid dán biilla birra, sihke govaid ja biilla registrerennummara.
– Mii leat iskan biilla, mii lei Franskálaš biilla. Eat gávdnan das maidege, muhto mii leat dál registreren dan ahte lea maiddái Kárášjogas leamaš.
Ávžžuha cavgilit
Leansmánne muitala sii ožžot duollet dálle cavgilemiid ahte olbmot leat oaidnán amas biillat bisánaddan geaidnoguoraide ja dat olbmot vázzet mehciin:
– Lea nu ahte olbmot leat deaivan oaidnit apmasiid váldime moniid besiin, muhto eai fuomáš daid cavgilit midjiide.
Grønnli ávžžuha olbmuid cavgilit politiijaide jus diekkáriid oidnet.
Vásihan beasserievváriid
Grønnli lohká sii lea moadde jagi áigi vásihan ahte olgoriikkalaččat ledje leamaš Kárášjogas rievideame lotti besiid.
– Dalle bissehalle Suomas duollus ja biilla siste gávdne feara maid. Doppe gávdne earret eará moniid ja rusttegiid maiguin doalaha liekkasin moniid. Dál lea áigi goas lottit álget besset, ja nu movt diehtit de gávdnojit doppe olbmot geain lea stuorat beroštupmi moniide ja lotti čivggaide go earáin, nu gohčoduvvon beasserievvárat, lohká son.
