-Almmuhus-
-Almmuhus-
OĐĐASATÁvžžuha dán luotta politiijaid dárkkistit

Ávžžuha dán luotta politiijaid dárkkistit

-

-

Politiijat ávžžuhit Facebook bokte olbmuid dieđihit sidjiide guđiid luottaid berrejit dárkkistit dál go skuvllat álget. Okta sis lea ávžžuhan politiijaid boahtit Guovdageidnui.

Odne álget skuvllat muhtun báikkiin Finnmárkkus, earret eará Guovdageainnus. Mánnodaga álget vel muđui eará báikkiin skuvllat. Skuvlaálgima oktavuođas leat Finnmárkku politiijat ávžžuhan olbmuid cavgilit sidjiide báikkiid gos berrejit dárkkistit.

Nuppiin sániin, sii leat ávžžuhan olbmuid cavgilit sidjiide gos vudjet beare leahtus, gos skuvlamánát maid vánddardit.

 

Beare leahtus vudjet

Okta sis guhte lea čállán cavgileami lea guovdageaidnulaš Wenche Marie Sara. Sus lea alddis nuoraidskuvlla agis mánná, muhto son oaidná dávjá man leahttu biillain lea Guovdageainnu mánáidskuvlla guora.

– Das lea dál 30 km/d leahttomearri, liikká leat máŋggas geat eai doahttal dan leahttomeari ja vudjet arvat alladet leahtuin, lohká son ággan manin lea cavgilan.

 

(Ášši joatká gova vuolábealde)


Wenche Marie Sara mielas livččii dehálaš ahte politiijat dárkkistit Guovdageainnu skuvlageainnu. Priváhta govva

Unnidedje leahttomeari

Sara muitala ahte diibmá lei lihkohisvuohta juste mánáidskuvlla bokte, ja dan maŋŋel de vuoliduvvui ge leahttomearri 50 km/d ja dálá 30 km/d lehttui.

 – Vaikke lea vuoliduvvon, de liikká leat olu biillat mat eai doala dan leahttomeari. Danin livččii dehálaš dakko dárkkistit go skuvllat álget, lohká son.

 

Árvvoštallet juohke cavgileami

Politiijat leatge iežaset Facebook ávžžuhusain ožžon ollu cavgilemiid olbmuin miehtá fylkka, ja Finnmárkku politiijameašttir Ellen Katrine Hætta lea hui duhtavaš go čájehuvvo nu stuora beroštupmi álbmogis. Son muitala sii leat ožžon eanemus cavgilemiid Mátta-Várjjagis ja Álttás. Son lohká dat ii leat dieđusge makkárge jienasteapmi.

– Mii árvvoštallat juohke cavgileami, árvvoštallat daid ja čuovvolit daid nu bures go vejolaš. Dán vuogi mielde oažžut maid dehálaš máhcahemiid ja maiddái dehálaš báikkálaš máhtu, maid birra eat soaitte ovdalaččas diehtit, lohká son.

(Ášši joatká gova vuolábealde)


Finnmárkku politiijameasttir Ellen Katrine Hætta. Vuorkágovva: Astrid Helander

Álki oažžut oktavuođa

Hætta lohká lea vuohččan go Finnmárkku politiijat dáinna lágiin Facebook bokte geahččalit gulahallat álbmogiin.

– Mii geahččalit ođasmahttit iežamet, ja mii diehtit ollu olbmot geavahit Facebook beaivválaččat. Soaitá maid ahte oažžut cavgilemiid olbmuin geat muđui eai livčče váldán oktavuođa, danne go Facebook lea álkis vuohki gulahallat, lohká Hætta.

 

Gártá eanet johtolat

Trygg Trafikk ráđđeaddi Helene Formo muitala sii ovttasbarget politiijaiguin ja maiddái skuvllaiguin, mii guoská oadjebas skuvlageainnuide.

– Viiddis fylkkain, nu movt Finnmárkkus, de lea áibbas dárbu ahte mánát fertejit skuvlii beassat bussiin dahje ahte váhnemat dolvot. Dat muitala ahte sáhttá gártat eanet johtolat skuvlla birrasis.

 

Paradoksa

Formo muitala Transportekonomalaš instituhtta johtolatdábiid iskosa logut čájehit ahte logi váhnemis, de leat njealjis sis geat vásihit ahte sin mánáin lea dorvvuhis skuvlageaidnu.

– Lea paradoksa ahte váhnemat, geat háliidivčče mánáideaset eanet oadjebas skuvlageainnu, ieža leat dagaheame dorvvuhis skuvlageainnu.

 

Álggahan prošeavtta

Eastadan dihte skuvlageaidnolihkuhisvuođaid ávžžuha Trygg Trafikk skuvllaid hukset oadjebas sajiid skuvllaid olggobeallái.

– Mis lea jođus našunála prošeakta dál mii gohčoduvvo «hjertesone», mas ulbmil lea oččodit buoret skuvlabirrasiid gos eai leat biillat. Prošeavttas leat mielde earret eará Trygg Trafikk, politiijat, Stáhta geaidnodoaimmahat ja Dearvvašvuođadirektoráhtta, ja dat galgá buoridit dearvvašvuođa ja nannet birrasa sihke giliin ja gávpogiin, lohká Formo.

 

 

-Almmuhus-