Marianne Blind jáhkká dat bidjá deattu politihkkariidda, dahkat juoidá boraspireváttisvuođain maid boazodoallit vásihit.
Marianne Blind jáhkká dat bidjá deattu politihkkariidda, dahkat juoidá boraspireváttisvuođain maid boazodoallit vásihit.
– Jáhkán dat lea vuohki movt njuolgut váikkuhit ahte doaimmat biddjojit johtui. Mun in dieđe, muhto sávan ahte dáhpahuvvá juoga, go boraspiret váikkuhit elliid dili. Jáhkán jus buohkat dieđihit Biebmobearráigehččui, de álgit njammat resurssaid ja dat bidjá deattu politihkkariidda ahte juoga ferte dáhpáhuvvat, lohká Marianne Blind.
Blind ii leat ieš boazobargi, muhto son čilge visot su lagasolbmot leat boazodoalus. Son gullá Rostučerrui, Ruoŧa beallai. Son dovdá heađi ja morraša, go gullá goaskimiid speadjamiid birra. Sis lea geasseorohat ja guottetbáiki Norgga bealde, ja dainna lágiin váikkuhit Norgga meahcceeallit maiddái sin eallinlági.
– Veara dieđihit
Marianne Blind ávžžuha boazodolliid dieđihit juohke áidna dáhpáhusa jus goaskin lea leamaš ealu siste, dahje jus goaskin lea goddán dahje soardán bohcco.
– Dat váikkuha elliid eallindili, ja elliidčálggu. Go boazu ii goasse beasa guohtut ráfis, ii ge livvadit ráfis. In jáhke áldu, mas leat 14 goaskima bajábealde, beassá ráfis guohtut. Dieđán ahte mun goit in dagaše dan. Juohke diŋga mii váikkuha elliid dili, dan lea veara dieđihit. Biebmobearráigeahčču ferte de reageret ja maid áicat guohtunelliid dili, lohká Marianne Blind.
Beroštupmi oažžut dieđuid
Biebmobearráigeahču Finnmárkku ossodaga hoavda Siv June Hansen lohká ahte sidjiide bohtet unnán dieđut juste boraspiriid birra, ja lasiha ahte dávjjimusat dat dieđut mannet njuolga Fylkkamánnii. Biebmobearráigeahčus ja Fylkkamánnis lea lagas oktavuohta dain áššiin, ja sis lea guovttebealat dieđihangeatnegasvuohta.
Hansen čilge ahte Biebmobearráigeahčču iská buot dieđuid maid ožžot, beroškeahttá makkár eallis lea sáhka.
– Mis lea beroštupmi oažžut dieđuid heajos elliidčálggu birra man boraspiret leat dagahan, ja daid dieđuid mii váldit viidásit čoahkkinarenaide. Biebmobearráigeahčču searvá Boraspirelávdegotti čoahkkimiidda áicin, gos dát fáddá digaštallojuvvo. Mis lea lagas oktavuohta Fylkkamánniin, mii oažžut kopiija mearrádusain, muhto eat oaččo sis dieđuid ovttaskas elliid birra.
Sáhttet buktit cealkámuša
Go Ávvir jearrá guđe ládje Biebmobearráigeahčču sáhttá elliidčálggu oktavuođas váikkuhit jus olu boraspiret leat guovllus, de Hansen čilge ahte Biebmobearráigeahčču sáhttá buktit cealkámušaid Fylkkamánnii, muhto sis ii leat váldi mearridit movt ge, galgá go váldit eret goaskimiid dahje eará boraspiriid ovtta guovllus.
– Mii eat ge sáhte gohččut boazoeaiggádiid sirdit ealu dakkár báikái gos eai leat boraspiret, visot dat gullá Fylkkamánnii. Ii leat eahpádus ahte boraspireváttisvuohta lea heajos elliidčálgu, jus guottetbáikkis leat olu goaskimat. Dás lea sáhka politihkas, ja dat ii leat min váldi, lohká Hansen.
