Sámi joatkkaskuvlla ja boazodoalloskuvlla rektoris ii leat čilgehus dasa go stuorat oassi ohppiin eai hálit leat “russa”. Muhto dáinna ge lea duhtavaš.
Sámi joatkkaskuvlla ja boazodoalloskuvlla rektoris ii leat čilgehus dasa go stuorat oassi ohppiin eai hálit leat “russa”. Muhto dáinna ge lea duhtavaš.
Sámi joatkkaskuvlla ja boazodoalloskuvllas Guovdageainnus russaidvearru nuoraid gaskkas, geat leat čađahan 13 jagi skuvlla vázzima, ii leat nu viiddis oaivvilda skuvlla rektor Ellen Inga O. Hætta.
– Lihkus mis eai leat dát geat ostet divrras biillaid ja bussiid nu mo eará báikkiin riikkas. Dán dáfus dat lea mu mielas hui buorre.
Nubbi jagi ávvudoalut skuvllas
Diimmá rájes leat sámi joatkkaskuvlla ja boazodoalloskuvllas Guovdageainnus dáid ohppiid geat gerget skuvllas ávvudan eará ládje. Dán jagis ge maŋŋel go oahppit čađahit buot eksámeniid, beaivvi ovdal go nohká skuvla, de bovdejit ohppiid ja váhnemiid ávvudit skuvlii.
– Oahppit árvaledje ahte sin mielas lea riektá váhnemiid bovdet deike go sii gerget joatkkaskuvlla. Min mielas, dát lea hui vuogas, ja maiddái lea hui riektá dat ahte go lea vázzán 13 jagi skuvlla juoga ládje dat markerejuvvo skuvllas. Oahppit ledje hui duhtavaččat diibmá. Ja váhnemiid mielas lei maiddái somá boahtit deike borrat gáhkuid. Dan mii áigut joatkit, lohká sámi joatkkaskuvlla ja boazodoalloskuvlla rektor Ellen Inga O. Hætta.
Loga maiddái: – Dát lea eambbo skuvlla loahpaheami go festen
– Ii galgga skuvlla ovdii mannat
Dán jagis sámi joatkkaskuvlla ja boazodoalloskuvllas 38 oahpis geat gerget skuvlla 13 oahppi válljejedje leat “russan”. Mii lea eaktodáhtolaš doaimma. Ávvira journalista ge jearai lea go rektoris mearkkašumit dása manne nuorat háliidit beare geargat skuvlla dábálaččat ii ge leat “russa”?
– In oba ge dieđe manne nu. Áibbas váttis diehtit. Mis ii leat leamaš dát nu fokusis. Muhto seammá dát ahte mii leat lohkan dan ahte ii galgga mannat skuvlla ovdii dahje oahppama ovdii, ja ii galgga givssidit nuorabut mánáid. Dát lea mis leamaš fokus. Ja dan birra mii humadit juohke jagi.
