Artistan šaddat ja čuovvut iežas váimmu

Aili Kathrine lei Álttás go Ávvir válddii sutnje oktavuođa. Doppe son vázzá goalmmát jagi joatkkaskuvlla. Muhto ii dušše vácce skuvlla. Nuorra nieida bidjá ollu áiggi ja návccaid earret eará musihkkii. Iežas lohká álohii lávlon.

– Ledjen 12-jahkásaš go álgen lávlut. Dalle go ledjen UKM:as mielde lei vuosttaš háve go almmolaččat lávlon.

UKM dahje NKD lea nuoraid kulturdeaivvadeapmi masa gullet ollu smávva báikkálaš festiválat masa sáhttet searvat vaikko makkár kulturvugiid ovdanbuktimiiguin. Muhto galgá leat vuollel 20 jagi boaris. Juohke gielda sádde kvalifiserejuvvon nuoraid viidáset fylkkadeaivvadeapmái, doppe sii ovddastit iežaset gieldda. Nuppe vuorus sádde juohke fylka sullii 30 oasseváldi nationála NKD-festiválii.

Dáidda gilvuide Aili Kathrine Wergeland Teigmo searvvai lávlagiin “Ailicat” ja lávlui eŋgelasgillii.

Biras váikkuhii

Aili Kathrine lei 6-jahkásaš nieiddaš go álggii Kárášjoga kulturskuvlii. Doppe son fuobmái; «– Háliidan lávlut».

– Vázzen kulturskuvlla Kárášjogas go lávlugohten. Mun lean ieš kulturberošteaddji. Ja skuvllas lei kreatiiva biras. Mun ieš ge dalle dánson. Dalle fuomášin ge ahte áiggun lávlut.

Maŋŋel go lávlugođii, de nuorra nieiddas ledje ollu gilvvut, musihkkadáhpáhusat masa searvvai.

Nu mo nuoraiddeaivvadeapmi ja Idol TV2 nammasaš prográmmii mas olbmot čájehit iežaset lávlunčehppodagaset. Musihkka čehppodaga ovddas lei Aili Kathrine ožžon nu gohččoduvvon “Drømmestipend” dahje niehkostipeanda jagis 2013. Stipeanda juhkkojuvvo jahkásaččat ovttasbarggus Norgga kulturskuvlaráđis ja “Norsk Tipping”:s. Dát addo 100 nuoraide geat leat čeahpit iešguđet ge kultursurggiin.

Dasa lassin Aili Kathrine almmuha lávlagiid ja filmmažiid iežas profiilii Youtube – neahttabáikái.

Cover-lávlagat ja eŋgelasgiella

Dássážii iežas lea son iežas Youtube profiila bokte almmuhan cover lávlagiid. Cover lávlá lea dakkár lávlá mii ii leat ođas, muhto ođđasit lávlon ja dat sáhttá leat lávlon eará vuogi mielde.

Nu dahká Aili Kathrine. Ikte son almmuhii musihkkafilmma lávlagii “Faded” man artista Alan Walker lávlu.

– Mun lean ikte bidjan Youtubii iežan veršuvnna dan lávlagis. Liikon lávlut eŋgelasgillii. Oainnát eŋgelasgiella lea hui riikkaidrasttildeaddji giella. Ja dat šattai beare nu ahte almmuhan beare eŋgelas lávlagiid.

Aili Kathrine gárvii dán vahkkus musihkkafilmma «Faded» lávlagii. Ustibat ledje veahkkin filbmet, čuohppat ja eará bargguid dahkat.

– Hui somá go June Bjørnback, Daniel Olguin ja Tanja Norbye veahkehedje dainna bargguin. Sin haga livččii váttis.

Sámegiella ii leat váttisvuohta

Dassážii Aili Kathrine lea almmolaččat lávlon dušše eŋgelasgillii, muhto ii loga ahte ii hálit sámegillii lávlut.

– Mus leat muhtin lávlagat maid ieš lean čállán sámegillii, ja smiehtan vel čállit sámegiellávlagiid. Muhto liikon eŋgelasgillii lávlut go lea álkit.

Iežas lohká soaitit maiddái searvat Sámi Grand Prix lávlunoassái. Muhto ii sáhte vuos dadjat goas.

Musihkain eallit boahtte áiggis

Aili Kathrine lea 18-jahkásaš muhto dál jo diehtá maid háliida bargat boahtte áiggis.

– Háliidan eambbo almmuhit filmmaid ja lávlagiid Youtubii. Ieš ge áiggun eambbo čállit lávlagiid. Háliidan leat eambbo kreatiiva. Háliidan lávlut olles áiggi ja čuovvut dan maid váibmu lohká.

Doarjja váhnemiin, lágašolbmuin ja ustibiin lohká buorre motivašuvdna dása.

– Mun lean nu ilus go váhnemat ja ustibat dorjot mu. Lean giitevaš dán ovddas.

Soaitit Amerihkkái

2014/15 skuvlajagi golladii Aili Kathrine Amerihkas,  gos beasai ollu vásihit. Vásáhusaid birra son čálii bloggastis. Dál son vázzá joatkkaskuvlla Álttás muhto háliidivččii fárret fas Amerihkái, gos su mielas leat eanet vejolašvuođaid lihkostuvvat artistan.

– Na áiggošin dohko go jurddašan doppe lea álkit oažžut dárbbašlaš veahki jus galggan artistan šaddat. Ja ieš servodat lea stuorat. Dán dáfus maid lea álkit oahpásnuvvat ja lihkostuvvat artistan. Muhto ii dat nu álki leat dohko beassat.

Su eadni, guhte álo lea dorjon nieiddas Áili Kathrine, ii leat dál vuos nu movttat dáinna go nieida háliidivččii fárret Amerihkkái.

– Juste dál gal eadni ii leat nu ilus. Sávan ahte dat ordnašuvvá go son lea álo dorjon mu das maid bargan, loahpaha nuorra artista.