Árja skeŋke ávvukonseartta álbmogii

Guovvamánus leat stuora ávvudoalut Troandimis, Tråante 2017.

Olles nuppi vahku guovvamánus ávvudit sámit ahte lea 100 jagi áigi go sápmelaččaid vuosttaš riikkačoahkkin lei. Dan vahku leat olu dáhpáhusat Troandimis, kultuvrralaš ja politihkalaš doalut.

Árjja sámediggejoavku maid searvá doaluide ja lágida ávvukonseartta, mii lea rabas buohkaide.

Árjja joavkojođiheaddji Laila Susanne Vars muitala ahte Árja háliida addit ávvudoaluide ja álbmogii albma ávvuskeaŋkka.

– Ja mii de lea buoret go skeŋket nuvttá-konseartta sámi artisttaiguin ja seammás veahkehit sámi artisttaid eanet dovddusindahkat, lohká Vars.

Álggahit válgagičču

– Árja lea bures lihkostuvvan politihkalaš bargguiguin maŋemus guovtti áigodagas, ja mii leat ožžon olu doarjaga sámi álbmogis, min politihkalaš áŋgiruššamii. Dá lea min vuohki giitit sámi servodaga ja seammás dáinna konsearttain álggahit mii Árjja Sámediggeválgagičču Tråantes dien vahkus. Min politihkkárat leat dál hirbmat gergosat Árjja politihka ovddidit, muitala Vars.

(Ášši joatká gova vuolábealde)

Konsearttas lea maid jurdda eará sámi beakkálmas artisttaide addit lávdesaji.

Vars duođašta ahte dološ beakkánat Deatnogátti Nuorat leat maid jerrojuvvon čuojahit konsearttas, ja dat orro menestuvvamin, čohkket goit oasi Deatnogátti Nuorain konsertii.

Muđui soitet maid eará sámi artisttat lávket ávvukonseartta lávdái, buot ii leat vel almmolaš.

Buohkat buresboahtimat

– Árja háliida sámi kultuvrra ja musihka veahkkin ovddidit. Deatnogátti Nuorat ledje dehálaš láidesteaddjit sámi lihkadusas, hirbmat somá jus mii sáhttit fállat sihke ođđaáigásaš ja ovddeš dovddus sámi šuoŋaid.

– Buohkat leat dieđusge váimmolaš bures boahtin konsertii, sávvamis bohtet ollu sápmelaččat ja muđui gávpotolbmot. Ii eisege dárbbaš leat Árjja miellahttu, muhto áinnas sávašeimmet eanet miellahtuid maid lullisámi ja julevsámi guovlluin, dadjala Vars vel loahpas.