Ánnásuolo lea ođđa musihkkajoavku mii aiddobáliid lea álggahuvvon, ja sii almmuhit ge juo vuosttaš juovlasiŋgela juovlamánu 1. beaivvi.
Ánnásuolo lea ođđa musihkkajoavku mii aiddobáliid lea álggahuvvon, ja sii almmuhit ge juo vuosttaš juovlasiŋgela juovlamánu 1. beaivvi.
Juovlamánu 1. beaivvi almmuha ge ođđa musihkkajoavku vuosttaš siŋgela, mii lea sámegillii ja lea heivehuvvon juovlalávllan. Ánnásuolo lea aiddo álggahuvvon joavku nas leat iešguđetlágan čuojaheaddjit. Ávvir lea humadan gulahallanhoavddain, gii maiddái čuojaha gitára joavkkus, John-Kåre Hansen.
Heivii bures juovllaid
Ánnásuolo joavku báddii «Nástealbmi» musihka čakčat, ja mearridedje almmuhit juovlamánus musihka. Hansen lohká musihka heivet bures juovlamusihkkan, ja sii háliidit ahte olbmot galget beassat gullat veaháš makkár musihkka sis lea vuordimis.
– Mii oaččuimet muhtimin kommentára ahte diet musihkka heivešii juovlamánnui teavstta dáfus ja maid go dalle lea hui seavdnjat olgun. Musihkka attii veaháš dego juovladovddu sihke midjiide ja maid olbmuide geat leat gullan musihka, muitala gulahallanhoavda ja gitárračuojaheaddji John-Kåre Hansen.
Gullogoahtá eambbo musihkka
Ánnásuolo ii almmut go ovtta lávlaga dál ovdal ođđajagemánu, muhto sii leat bargamin skearruin man almmuhit njukčamánu boahtte jagi. Muhtin teavsttat leat vižžon Áillohačča divttain. Hansen muitala áhte «Nástealbmi» lea okta dáin jaskadeamos lávlagiin skearrus, ja eará lávlagat eai leat nu jaskadat go leat iešguđetlágan čuojanasat mielde. Muhtin lávlagiin gullo maid luohti, ja Hansen muitala go sii «live» čuojahit, de soaitá gullot eambbo luohti vel go dat mii skearrus lea.
Ožžon stuora beroštumi
Vaikko joavku lea oalle ođas, de liikká leat sii ožžon ollu beroštumi. Sis galget máŋggat konsearttat boahtte jagi. Sii leat juo várrejuvvon gitta čakčii 2017.
– Lea hirbmat gelddolaš gullat makkár oaidnu olbmuin lea min musihkkii. Vaikko skearrus leat dušše sámegiel lávlagat, de liikká sávan ahte sii, geat eai hálddaš sámegiela, guldalit min musihka.
Dovddus lávlu
Guovdageaidnulaš Marianne Pentha lea ođđa musihkkajoavkku lávlu. Son lea dovddus lávlu ja lea leamašan TV:s mielde máŋgga lávlunprográmmas. Hansen lohká Marianne lea hui čeahpes lávlu, ja su mielas lea áigi ahte son beassá lávlut skearrus, ja maiddái čájehit guldaleddjiide masa son lea čeahppi.
Bánda čuojaheaddjit
Marianne Pentha lea lávlu, John-Kåre Hansen čuojaha gitára, Eirik Fjelde piáno, Ellen Andrea Wang bassá ja Jakop Janssønn rumbbuid.
Čállán: Ann-Karoline Eira
