Gaskavahkku lei jahkásaš ginttalcahkkeheapmi Álttás, gosa buot suohkana mánáidgárddit ledje boahtán.
ÁLTÁ: Mánáidgárddemánát ledje bovden olbmuid Álttá guovddážii, gosa ledje ordnen skeaŋkka álbmogii.
Sii čuvgejedje guovddáža gintaliiguin ja lávlo moadde lávlaga.
– Jurdda lea oažžut mánáid eanet oidnosii gávpogis ja muđui servodagas. Sis lea nu ollu máhttu ja hutkáivuohta mas mii rávesolbmot galggašeimmet váldit stuora oasi. Dáinna vugiin ožžot Álttá suohkana ássit skeaŋkka mánáidgárddemánáiguin, seammás go mii beassat čájehit ahte mii gávdnot ja ahte mis lea gelbbolašvuohta lágidit doaimmaid mii lea illun servodahkii, muitala okta lágideddjiin Siv Kristin Ryeng, gii lea fágajođiheaddji Dálbmeluovtta bajásšaddanguovddážis.
Bissovaš lágideapmi
Dá lea ovccát geardde go cahkkehit gintaliid Álttá guovddážis.
– Dat lea okta dain buoremus dáhpáhusain jagis. Dat lea nu somá oaidnit go mánát bohtet čuovggaiguin, ja nu somá deaivvadit, dadjá Ryeng.
