Nu lohká Johan Ivvar Gaup, ovdalaš heargegilvvuid World Cup loahpaheami dán sotnabeaivvi, gos su heargi lea njunnošis vuoitit olles gilvvuid. Son leage ovddeš Norggameašttir skohtercrossas ja vuittii maid Sámi Grand prix juoiganoasi dán jagi.
Nu lohká Johan Ivvar Gaup, ovdalaš heargegilvvuid World Cup loahpaheami dán sotnabeaivvi, gos su heargi lea njunnošis vuoitit olles gilvvuid. Son leage ovddeš Norggameašttir skohtercrossas ja vuittii maid Sámi Grand prix juoiganoasi dán jagi.
Sotnabeaivvi leat njealját ja maŋemus gilvvut heargegilvvuid World Cupas Guovdageainnus. World Cup leat Sámi heargevuoddjinlihtu (SHL) gilvvut ja lágiduvvot Ruoŧas Bájalis, Suomas Heahtás ja Norggas Guovdageainnus. Buot gilvvuin leat hearggit ruohttán 1000 mehtera šiljuin.
Čehpodat feara mas
Maŋŋel dan golbma vuosttaš gilvvu lea Johan Ivvar Gaup hearggi Biddojuolggi njunnošis 104 čuoggáin. Ovddeš Norggameašttir skohtercrossas, ja Sámi Grand Prix juoiganoasi vuoitti dán jagi, sáhttá sotnabeaivvi maid vuoittit olles World Cupa heargegilvvuin. Jearaldahkii ahte lihkostuvvo go son buot mas gilvala vástida son ná:
– Mun lean agibeaivve lihkon gilvalit, lean dakkár gilvaleaddjiolmmoš, ja juohke diŋggas masa searvvan de lea álo mihtto vuoitit. Jáhkán buohkat geat servet man nu gilvui de dáhket dan vuoitin nammii, lohká son.
Bures dán dálvvi ruohttan
Gaup muitala go lápmahuvai skohtercrossas jagi 2012 ja šattai heaitit dainna, de fertii álgit juoidá eará.
– Go in šat sáhttán ieš hárjehallat, de álgen herggiid dápmat ja hárjehallat daid ja dan lean dál máŋga dálvvi dahkan. Dál lea doaivva ahte Biddojuolgi nagoda vuoittit Cupa, go lea dán dálvvi oba bures ruohttan. Biddojuolgi vuittii sihke Bájilis ja Heahtás, ja go beassášlávvordaga Guovdageainnus oaččui nu heajos álggu ja šattai veaháš obbasa ruohtat, de bođii viđat sadjái. Šaddá garrá gilvu sotnabeaivvi, muhto jus Biddojuolgi nagoda dan viđa buoremusaid searvái sotnabeaivvi maid šaddat, de gal vuoittán olles World Cupa, lohká Gaup.
( Ášši joatká gova vuolábealde)
Čoagget čuoggaid
Maŋemus gilvvuid lágidit Duottar hearggit, ja jođiheaddji Aslak Sokki čilge World Cup heargegilvvuin leat seniorluohkás guokte oasi, báhkkaluohkká ja rabasluohkká.
– Juohke gilvvus oažžu vuoitti báhkkaluohkás 36 čuoggá, nubbin saddji oačču 35 čuoggá ja nu manna vulos guvlui. Rabasluohkás ges oažžu juohke gilvvus vuoiti 18 čuoggá, nubbin sadji oažžu 17 čuoggá ja nu viidáseappot. World Cupas lohkkojit goappeš luohkát seamma loahppabohtosii, čilge Aslak Sokki.
( Ášši joatká gova vuolábealde)
Gelddolaš gilvvut
Vaikko Sokki maiddái einnosta Biddojuolggi World Cupa vuoitit, de lohká son lihkká šaddat gelddolažžan loahppagilvvuid.
– Leat máŋga ođđa hearggi mat leat leamaš Suoma Cupas ja sáhttet vuoitit maŋemus gilvvuin, nu movt earret eará Suiva, E-čuoivvat ja Mihao. Ja dieđusge Ráidná ja Biddojuolgi, lohká son. Suoma Cupa lea suopmelaččaid Cupa, mas leat 5 gilvvu. Doppe diktet Norggabeale herggiid oassálastet eaŋkil gilvvuide, muhto eai oaččo čuoggáid cupas, lohká Sokki.
Juniorluohkás lea Sokki iežas heargi Burn gii lea njunnošis vuoitit Word Cupa, mainna su nieiddaš Mina Ariane K. Sokki vuodja.
