Romssa joavku Violet Road almmuha gávccát skearru, «Back on Level One», nissonbeaivvi, njukčamánu gávccát beaivvi.
Skearru lea báddejuvvon Studio G:s, Brooklynis, New Yorkas. Dovddus Joel Hamilton lea buvttadan skearru.
– Viimmat vulggiimet fas New Yorkii fas deaivvadit Joel Hamiltonain gii buvttadii 2018 albuma, «Lines Across Light», su hirbmat buori Studio G:s Brooklynas. Olles mátki šattai máinnasin, ja boađusin šattai skearru mainna mii leat hirbmat čeavlát, ja lea dološ vuogi mielde ráhkaduvvon, lohká joavku preassadieđáhusas.
Dán skearrus lea joavku almmuhan guokte lávlaga, «I will love you anyway» ja «Gold». Vuosttaža namuha Dagsavisen ahte lea «nana hit» man dáidet ollugat lávllodit, seammás go «Gold» ain čuojahuvvo NRK P1:žis.
«Back on Level One» almmuhuvvo bearjadaga njukčamánu 8. beaivvi. Seamma beaivvi almmuhuvvo maid guhkit konsearta-turnea jagi 2024:s.
