Nuorra sámi artista Katarina Barruk almmuha iežas vuosttaš skearru Ubmis boahtte vahkku.
Nuorra sámi artista Katarina Barruk almmuha iežas vuosttaš skearru Ubmis boahtte vahkku.
Ubmi sámi searvvis illudit go Katarina Barruk ovttas Vuelie skearrofitnodagain almmuha skearru boahtte vahkku čakčamánu 2.beaivvi. Dát lea vuosttaš skearru maid Katarina Barruk almmuha, čállá Ubmi Sámi searvi preassadieđáhusas.
Ieš ráhkadan musihka
Katarina lea ieš ráhkadan musihka ođđa skearrui mii lea Ubmisámegillii. Son seaguha árbevirolaš sámi musihka ođđaáigásaš hápmái. Ovttas su joavkkuin lea son čuojahan sihke Riddu Riđđus, Márkomeannus, Sámi vahkkus ja Noliamässas. Katarina lea musihkkaskuvlla čađahan golbma jagi ja lea okta dain nuorra sámiin gii máhttá Ubmisámegiela bures.
Su joavkkus čuojaheame leat earret eará mielde Frode Fjellheim, Jonas Knutsson, Marja Helena Fjellheim Mortensson ja Snorre Bjerck. Frode Fjellheim gii lea Disney filbmii «Frozen» ráhkadan váldomusihka lea maid buvttadan Barruk skearru.
Skearru almmuhuvvo čakčamánu 2.beaivve, ja čakčamánu 5.beaivvi lea almmuhankonsearta Tráhppie báikkis Ubmis.