Mánnodaga boahtte vahkku almmuha musihkar Bernt Mikkel Haglund iežas nuppi skearru, man lea gohčodan «De logai».
Mánnodaga boahtte vahkku almmuha musihkar Bernt Mikkel Haglund iežas nuppi skearru, man lea gohčodan «De logai».
Skearru lea gávdnamis gávppiin mánnodaga rájes, ja maiddái streamenbálvalusain nu go Spotifys.
Áigá čállán lávlagiid
Haglund lea eanaš buvttadan musihka eará artisttaid ovddas, muhto dál almmuha son fas iežas musihka. Son muitala ođđa skearrus, mas lea namma «De logai», leat 10 bihtá.
– Das leat bihtát mat leat oalle boarrásat, dahje maid mun lean áigá ráhkadan. Bealli bihtáin leat vihttanuppelohkái – guoktelogi jagi boarrásat.
Persovnnalaš teavsttat
Skearrus leat sámegiel lávlagat, sálmmat ja okta luohti.
– Lávlagiid lean čállán dárogillii ja leat jorgaluvvon sámegillii, ja sálmmaide lean ráhkadan ođđa šuoŋaid. Teavsttat leat persovnnalaččat, ja das lea okta luohti mielde, mii lea mu nuoramus bártni luohti, muitala Haglund.
Nieidda birra
Skearru namma lea «De logai», ja Haglund lohká dat lea sutnje hui persovnnalaš.
– In dieđe ollu galggan muitalit, muhto dat lea áigá ráhkaduvvon ja lea ovtta nieidda birra geasa ledjen guhkit áiggi hirbmosit liikostan. De ovtta beaivvi logai munnje, Haglund bisánastá ja joatká: – Na oaččut gullat skearrus maid logai, reaská Haglund.
Ieš čuojaha buot
Erenoamáš skearrus lea Haglund ieš guhte čuojaha buot instrumeanttaid. Son čuojaha rumbbuid, bássa, gitára, keyboard ja lávlu.
– Dán áigásaš teknologiijain lea vejolaš dan dahkat, álggos čuojaha ovtta instrumeantta ja bidjá dađi mielde osiid nala, ja nu lágida olles lávlagiid, lohká son.
Guhká bargan musihkain
Haglund lea bajásšaddan olggobealde Oslo, Lulli-Norggas, ja son lea guhká čuojahan musihka. Gávccejahkásažžan álggii son skuvlakorpsii, ja nuppelohjahkásažžan álggii jovkui gos son čuojahii rumbbuid. Joatkkaskuvllas váccii son musihkkasuorggi ja maŋŋelaš válddii jietnateknihkkároahpu alit dásis.
– Maŋŋel dan osten alccen musihkkastudio ja álgen ráhkadit ja buvttadit musihka, ja go fárrejin Guovdageidnui loahpas 90-logu, de buvttadišgohten musihka sámi artisttaide maid. Son muitala dán ođđa skearru lávlagat leat čállon dien áiggis ja son ii leat šaddan almmuhit daid ovdal.
Háliidii juogadit musihka
Haglund sávvá skearru váldot bures vuostá ja olbmot liikojit. Sus ii leat mihttun ahte galget «hitat» šaddat ja skearruid vuovdit duháhiid mielde.
– Eai leat nu issoras stuora vuordámušat, ja mun háliidan juogadit olbmuiguin lávlagiid. Mun šattan hui ilus jus ovdamearkka dihte jerron čuojahit konsearttaid, lohká son.
