Leat go don nuorra, veaha boarrásit, dehe vel boarrásit? Lea go váttis válljet maid galggat iienastit čavčča suohkanválggas? Dán lohkkiidreivves ákkastallet Guovdageainnu Johttisápmelaččaid listtu nuorat manne sin galggašit jienastit.
Leat go don nuorra, veaha boarrásit, dehe vel boarrásit? Lea go váttis válljet maid galggat iienastit čavčča suohkanválggas? Maŋemus áigemearri jienastit dán jagi lea čakčamánu 11. beaivvi. Dan ovdal sáhtát don ovdalgihtiijienastit.
Dás áigut mii, Guovdageainnu Johttisápmelaččaid listtu nuorat, buktit ákkastallamiid manin galggašit jienastit min.
Min listtus leat hui olu nuorat, ja mii leat hui ilus go mii leat ožžon luohttámuša beassat váikkuhit politihka. Leat go jurddahan ahte go jienastat válggas, leat don mielde mearrideamen? Geavat iežat jienastanrievtti.
Guohtuneatnamat leat deháleamos resurssat boazoealáhusas, ja lea hui dehálaš ahte dat doalahuvvojit. Dutkan čájeha ahte measta beaivválaččat massit mii guohtuneatnamiid eará doaimmaide ja beroštumiide. Dat vuorjá min árgabeaivvi. Min ealáhusa áitet beaivválaččat huksejeaddjit ja lea stuora áittan billistit min boahtteáiggi boazoealáhusas. Dan mii eat áiggo! Allet billis min árbejuvvon boazodoallorievtti!
Mii áigut bargat ahte min ealáhus ain galgá bissovaš ja mii oaivvildit ahte suohkan galgá areálaáššiin lassin dábálaš gulaskuddanvugiin dahkat eambbo doahttalan dihte boazoeaiggádiid, siiddaid ja orohagaid. Mii háldiidit bargosajiid suohkanii, muhto lea seamma dehálaš nannet dálá ealáhusaid.
Jus sihke boazodoalu nuorat ja dálu nuorat galget beassat bargat boazoealáhusas ja ávkkástallat meahci nu go min máttut leat dahkan, de lea hui dehálaš ahte suohkana mohtorjohtolat galgá stivrejuvvot našunála lágaid ja láhkaásahusaid mielde, gos árbevirolaš bievlaluottat biddjojit suohkana areálaplánii. Árbevieru bokte ferte addon sierra vejolašvuohta báikkálaš olbmuide ávkkástallat meahci luonddu gierdevaš rájiid mielde.
Mii, nuorat, háliidit ahte suohkanis galgá ássanmokta. Danin áigu JSL bargat ahte nuorain galgá leat vejolašvuohta sajáiduvvat suohkanii, dainna lágiin ahte ásahit eambbo viessosajiid ja earenoamážit boazealáhusa váste. Lea maid dehálaš bargat ahte boazoealáhus oažžu sierranaš vejolašvuođa oažžut loana viessobáŋkkus.
Ássanmokta boahtá maid das go suohkan doarju falástallama, kultuvrralaš festiválaid, sámi lágidemiid, bargosajiid, ealáhusovdáneami ja buriid oahppofálaldagaid. Astoáige- ja kultuvrafálaldagat buot agi olbmuide leat maid dehálaččat ja mii jurddahit ovttasbarggu Dáiddadáluin ja earáiguin iešguđet astoáigefálaldagaid nu go omd. dánsun, álbmotvuojadeapmi, kino, dáiddabájit, duodjieahkedat ja nu viidasit.
Jienas Guovdageainnu Johttisápmelaččaid listtu
Inga Marja Lango, Elle Sara Pulk, Mahtte Ante M. Sara, Mai-Lis Eira, Johan Ante Bæhr, Sara Maret Triumf, Inga Anne Karen Sara, Mikkel Johansen Hætta, Mihkkal Juhan Heandarat Nilut, Mikal Juhan Ailu Utsi, Aslak Henrik Eira, Mihkkal Mahtte Gaup
