Norgga Sámiid Riikkasearvvis (NSR) leat čielga vuordámušat dán jagáš rievdaduvvon našunálabušehttii go dán vahkku almmuhuvvo. Tråante lea okta vuordámušain.
Norgga Sámiid Riikkasearvvis (NSR) leat čielga vuordámušat dán jagáš rievdaduvvon našunálabušehttii go dán vahkku almmuhuvvo. Tråante lea okta vuordámušain.
Gaskavahkku miessemánu 11.beaivvi almmuha Ráđđehus rievdaduvvon našunálabušeahta jagi 2016 ovddas. NSR Parlamentáralaš jođiheaddji ja sámediggeláhttu Kirsti Guvsám oaivvilda ráđđehusas vejolašvuođa njulget diimmáš juolludemiid.
– Leat stuora dárbbut sámi servvodagas. Sámi ulbmiliidda bušeahttavárren lea njiedjan dan ektui. Dál go rievdadit bušeahta de lea Ráđđehusas ovttas eanetloguin vejolašvuohta divvut dán, muitala Guvsám.
Tråante dárbbaša ruhtadoarjaga
Boahtte jagi lea 100 jagi áige go sámiid vuosttaš riikadeaivvadeapmi čađahuvvui, ja dál plánejuvvojit stuora doalut Troanddimis guovvamánu boahtte jagi.
– Lea áibbas čielggas ahte Tråante 2017 doaluide ferte juolluduvvot ruhta rievdaduvvon bušeahtas. Dán rádjái lea boahtán unnán doarjja eisseválddiin. 100 jagi ávvudeapmi lea dehálaš sámiide, go doppe mii ávvudit min politihkalaš moriheami ja demokráhtalaš ovdáneami. Áiggun mannat nu guhkás ja dadjat ahte lea skandála jus Ráđđehus ii doarjjo dán, dadjá Guvsám.
Saemien Sijte
Kirsti Guvsám áigu maid čalmmustahttit lullisámi musea ja kulturguovddáža Saemien Sijte.
– Man guhká fertet mii vuordit ovdal go oažžut Saemien Sijte ođđa vistti sadjái? Dat ádjána ja ádjána, ja dál álgá šaddat heahpadin. Lullisámi kulturárbi ja historjá lea kássaid siste ja ráddjojuvvon bráhkaide. Dát ii šat váldde lági. Jus ii čovdo rievdaduvvon bušeahtas, de šaddet stuora vuordámušat 2017 bušehttii, loahpaha Guvsám.
