-Almmuhus-
KULTUVRA Álgo­álbmot-hip-hop Riddu Riđđui

Álgo­álbmot-hip-hop Riddu Riđđui

-

-

Riddu Riđđu lea almmuhan vuosttaš joavkku boahtte jagi festiválii.

Riddu Riđđu almmuha preassadieđáhusas ahte Snotty Nose Rez Kids leat boahtime boahtte jagi festiválii. Dan kanádalaš joavkkus leaba guokte álgoálbmotdievddu, Yung Trybez ja Young D.

Sudnos lei váttis bajásšaddan Kitimaat-reserváhtas, mii dagahii ahte gávnnaiga dorvvu hip-hopas ja šattai sudno vuohkin dovddahit dovdduid. 

Preassadieđáhusas čállet lágideaddjit ahte SNRK gullaba Haisla-álbmogii Brihttalaš Columbias, ja gudnejahttiba gullevašvuođa dohko musihka bokte. Álgoálbmotidentitehta, politihkka ja vuosttaldeapmi leat guovddážis sudno musihkas. SNRK lea maid šaddan hui beakkánin Kanádas. Oallugat rávdnjehit sudno musihka ja leaba ožžon máŋga bálkkašumi musihka ovddas. Festiválajođiheaddji Sandra Márjá West doaivu sudno sáttasáni heivet Riddu-gehččiidde.

– Mu oainnu mielde ii gávdno buoret namma go SNRK mainna álggahit boahtte festiválaáigodaga! Sis lea hui buorre sáttasátni masa jáhkán Riddu-gehččiid liikot. Seammás leaba vel nu ihána čeahpit lávdde alde, dadjá West.

Álgán vuovdit

Odne vuovdigođii Riddu Riđđu bileahtaid boahtte jagáš festiválii, čállet sii preassadieđáhusas.Vuosttaš 100 bileahta vuvdet sii hálbái.

– Diibmá lei mis gehččiidolahus festiválas. Riddu Riđđu ii gal vuoiŋŋas ovddeš olahusaid dihte, ja dál leat bidjan buot návccaid boahtte jagi festiválii, muitala West.

Sis leat plánat stuoridit vai nagodit dan.

– Earret eará leat mii dál hukseme ođđa ja stuorát váldolávddi mii addá gehččiide vel buoret vásáhusaid maid eai goasse dáidde vajálduhttit. Otná almmuheapmi lea dušše unna geahčastagaš das maid boahtte jagi festivála fállá, muitala festiválajođiheaddji Sandra Márjá West preassadieđáhusas.

- Advertisement -
-Almmuhus-