UiT lea bidjan johtui ovdaprošeavtta ovdánahttit sámegiella riektegiellan.
Tromssa árktalaš universitehta (UiT) juridihkalaš fakultehta postdoavttir Kristina Labba muitala preassadieđáhusas ahte lea Sis-Finnmárkku diggegottesundi, Finn-Arne Schanche Selfors gii lea vuolggahan jurdaga álggahit dákkár prošeavtta.
Oassi bargopáhkas «Sámegiella riektegiellan»
Selfors lea dán evttohusa ovddidan barggadettiin bargopáhkain mat leat gohčodan «Sámegiella riektegiellan». Dat barggut mat dán bargopáhkkii gullet galget leat mielde ovdánahttiime sámegiela riektegiellan ja ovdánahttit juridihkalaš tearpmaid sámegillii, ja dainna lágiin nannet sámiid riektesihkarvuođa.
Barggut leat lea oassin universitehta aitto álggahuvvon «Fyrtårnprošeavttas».
– Álgovuorus ovttasbargá fakultehta Finn-Arne Schanche Selforsain, muhto okta ovdaprošeavtta ulbmiliin leage gávdnat heivvolaš ja áigeguovdilis ovttasbargoguimmiid prošektii ja dasto ásahit váldoprošeavtta man váldomihttun de šaddá ovdánahttit sámegiela riektegiellan, čilge UiT preassadieđáhusas.
UiT čilge ahte duogážin prošektii lea maid dat ahte juste sáme- ja eamiálbmotriekti lea juridihkalaš fakultehta vuoruhansurggiin ja fakultehtas lea ge ambišuvdnan leat riikkaidgaskasaččat njunnošis dáin bargguin.
Studeanttat maid mielde bargguin
Gaskavahkku deaivvada ovdaprošeavtta bargojoavku Sis-Finnmárkku diggegoddesunddi luhtte.
– UiT juridihkalaš fakultehta lea nagodan oažžut dan mađe ruhtadeami prošektii ahte golbma bargi ja guokte masterstudeantta sáhttet geavahit osiid sin bargoáiggis ovdánahttit sámegiela riektegiellan, čállá UiT.
k.Earret Kristina Labba de leat bargojoavkkus mielde vuosttašamanueansa Ánde Somby, stipendiáhta Aila Biret Selfors ja masterstudeanttat Marion Ravna ja Johan Vasara.
Ovttasbarget almmolaš ásahusaiguin
Ovdaprošeavtta oktavuođas leat sádden bovdehusaid vejolaš ovttasbargoguimmiide olggobealde universitehta. UiT čállá ahte bargu ovdánahttit sámegiela riektegiellan eaktuda lagas ovttasbarggu gaskal almmolaš orgánain geain lea ovddasvástádus dahje geat juoga ládje barget sihkkarastit ja ovdánahttit sámegiela Norggas.
– Mii háliidit kártet makkár dárbbut leat dál, maid ferte dahkat ovddasguvlui ja maid guhtege ásahus sáhttá dan oktavuođas bargat ovdánahttit sámegiela riektegiellan, lohká Kristina Labba.
Kártet dála dili
Prošeavttajoavkku bargočoahkkimii mii boahtte vahkku dollo Deanus leat Sis-Finnmárkku diggegoddi ja UiT juridihkalaš fakultehta maid bovden olggobealde aktevrraid, nugo Duopmostuollohálddahusas, Sámedikki, Sámi allaskuvlla, Justiisadepartemeanta ja muhtun earáid. Jurdda lea álggahit kártemiid makkár hástalusaid dál oidnet go sámegiella geavahuvvo diggevuogádagas, mii dán rádjái lea dahkkon ja mo sámegiella dál geavahuvvo.
