Jan Skoglund Paltto ja Kirsi Paltto leaba iSámi.Press AS guokte vuođđudeddjiin ja leaba rámis álggahit ođđa sámi mediafálaldaga, mii galgá lassi fálaldahkan álbmogii.
Jan Skoglund Paltto ja Kirsi Paltto leaba iSámi.Press AS guokte vuođđudeddjiin ja leaba rámis álggahit ođđa sámi mediafálaldaga, mii galgá lassi fálaldahkan álbmogii.
Kárášjohkalaš Jan Skoglund Paltto lea beaivválaš jođiheaddji ođđa fitnodagas, mas leat vihtta eaiggáda.
Fitnodat ásahuvvui golggotmánu 6. beaivvi dán jagi ja galgá šaddat beaivválaš ođasportálan, dahje neahttaáviisan, mii deaddila juohke bearjadaga magasiinna.
– Jurdda vulggii das go mun lean dahkan iešguđet guorahallamiid dán prošeavtta hárrái ja geahččan ahte makkár fálaldagat váilot sámi mediamáilmmis, čilge Skoglund Paltto.
Sorjjasmeahttun ásahus
Jan Skoglund Paltto muitala iežas guorahallamiid olis gávnnahan sámi mediamáilmmis váilut mediaásahusa, mii lea sorjjasmeahttun ja lea čielga sámi profiila.
– Min ulbmil lea čállit analyhtalaš journalistihka, earet eará sámi vuoigatvuođaid birra ja gozihit ovdamearkka dihte sámi ILO-konvenšuvnna 169. Dán lean váillahan sámi media fálaldagas maŋimuš logi jagi, čilge Skoglund Paltto.
Ođđasiid buvttadeapmi galgá leat eanaš sámegillii, sihke davvi-, mátta- ja julevsámegillii, muhto muhtin ođđasat buvttaduvvojit maiddái dárogillii.
Dasa lassin galgá ásahusas áiggi mielde maiddái boahttet Web-tv fálaldat.
– Sullii 25 proseantta čállosiin almmuhuvvojit dárogillii ja reasta sámegillii. Muhtin oasit čállosiin leat nuvttá ja muhtin oasit eai, muitala son.
Vuosttaš magasiidna
Ođđa mediaásahus lea jo ráhkadeamen iežaset vuosttaš magasiinna, mii almmustuvvá loahpageahčen ođđajagemánu boahtte jagi.
Maiddái ođasportála galgá rahppot seammás.
– Mii leat ráhkadeamen Tråante 100 jagi ávvudoaluid oktavuođas ávvumagasiinna, mii almmustuvvá maŋimuštá ođđajagemánu 27. beaivvi, čilge son.
Jurdda ođđa mediaásahusas muitala beaivválaš jođiheaddji, lea beaivválaččat publiseret ođđasiid ođasportálii ja hábmet ja háhkat áigeguovdilis áššiid, maiddái servodat-, historjá-, kultur- ja valáštallanođđasiid.
Dát galget maiddái vahkkosaš ođasmagasiidnii, mii deaddiluvvo oktii vahkkus, juohke bearjadaga ja mii almmustuvvá maiddái ođas-appan.
– Ođasportálii ja appii almmustahttojit ođđasat beaivválaččat ja ođasmagasiidnii fas oktii vahkkui juohke bearjadaga, čilge Jan Skoglund Paltto.
Sisdoallomárkanastin
Beaivválaš jođiheaddji čilge maiddái sin vuoruhit nu gohčoduvvon «Content Marketing», mii mearkkaša sisdoallomárkanastima.
Das oaivvilduvvo buvttadit almmuhusaid mat sulastahttet journalistihka ja dávjá geavahit journalistihkalaš hámi vai almmuhusat ožžot olu beroštumi.
Dasa lassin lea iSámi.Press AS ohcamin olles leavttuin redaktevrra, geas lea váldoovddasvástádus ođasportála ja ođasmagasiinna sisdoalu dáfus.
– Mii ohcat olbmo geas lea stuorra beroštupmi sámi servodaga ovdánahttimii, háliida leat mielde huksemis ođđa friija sámi mediafálaldaga ja leat positiiva, gii ii bala hástalusain ja geas lea nana buorre bargomorála ja mediamáhttu, deattuha Skoglund Paltto.
