Son lea álggaheame appa mas gávppašeaddjit ieža besset hábmet gávtti man áigot oastit.
Son lea álggaheame appa mas gávppašeaddjit ieža besset hábmet gávtti man áigot oastit.
Inga Porsanger, guhte jođiha Inka duodjegávppi Kárášjogas, lea ožžon doarjaga Sámedikkis álggahit sierra gákte-appa. Gákte-appa lea prográmma dihtoris mii addá vejolašvuođa sidjiide, geat áigot gávtti oastit, ieža dihtoris «duddjot» makkár gákti galgá olggosoaidnit.
Ruovttus válljet ráfis
Porsanger muitala jurdda lea ahte olbmot ieža válljejit mihtuid, ivnniid ja ávdnasiid gáktái.
– Appa lea jurddašuvvon doaibmat nu ahte olbmot ieža besset ruovttus ráfis deavdit buot dieđuid movt gákti galgá, ja appas galgá ihtit animašuvdna gávttis mii čájeha makkárin šaddá oaidnit.
Sus lea ulbmil maiddái olahit viidábut márkaniidda.
– Dat galgá dagahit ahte olbmot, geat eai oro Kárášjogas ja eai beasa buvddas fitnat, sáhttet maiddái diŋgot gávtti, lohká son.
Eará gávttiid maid
Álggos lea Porsanger jurddašan Kárášjoga gávtti geahččalit, muhto áigu eará guovlluid gávttiid maid váldit mielde appii.
– Áiggun ovttasbargat eará guovlluid gáktegoarruiguin goarrut gávttiid maid ieš in máhte. Guovdageainnu gávtti gal dieđuš lea váttis go doppe leat hearvvat sogaid mielde, muhto lea vejolaš ráhkadit ovtta fásta minstara dasa, lohká son.
Ovttasbargá spealloráhkadeddjiin
Porsanger muitala son ovttasbargá Jorg Hauaniin Romssas, guhte beaivválaččat ráhkada neahttaspealuid ja appaid.
– Letne aiddo álgán ovttasbarggu, ja doaivva lea ahte dat appa gárvána guovvamánus boahtte jagi, lohká Inga Porsanger.
*/
