Kárášjoga gielda bovde rabasčoahkkimii gos áigot juohkit dieđuid guovtti ovdánahttinprošeavttas mat leat jođus gielddas.
Kárášjoga gielda bovde rabasčoahkkimii gos áigot juohkit dieđuid guovtti ovdánahttinprošeavttas mat leat jođus gielddas.
Kárášjoga gielda dieđiha preassadieđáhusas ahte sii lágidit gaskavahku, skábmamánu 15. beaivvi, diibmu 18-21 rabasčoahkkima Servodatviesus.
Doppe áigot juohkit dieđuid guovtti ovdánahttinprošeavttas gielddas; Álbmotmeahcceguovddáš ja Sámi giella- ja kulturguovddáš.
Álbmot, báikkálaš searvvit, fitnodagat ja ásahusat bovdejuvvojit searvat čoahkkimii oažžut dieđuid ja buktit oaiviliid.
Álbmotmeahcceguovddáš ásáhuvvo
Kárášjoga gielda lea váldán badjelasas láhčit dili oažžut áigái álbmotmeahcceguovddáža Bajit Anárjoga álbmotmeahci várás, das go ii vel leat ceggejuvvon sierra stivra dakkár guovddážii.
Dušše Kárášjoga gieldda bokte beassá Bajit Anárjoga álbmotmeahccái. Dasa lassin doppe lea bivnnut bivdit ealgga ja rievssaha, murjet ja varasguoli háhkat.
Gielddastivra lea čujuhan ahte «das go Kárášjoga gielddas lea stuorát geavahanberoštupmi ja eanet aktiivvalaš geavaheaddjit, de lea lunddolaš ahte hálddašanbáiki šaddá dán gildii».
– Dat mearkkaša ahte álbmotmeahcceguovddáš ásahuvvo Kárášjohkii, dieđiha Kárášjoga gielda preassadieđáhusas.
85 000 mátkkolačča
Ovttasbargu mátkkoštanealáhusain gártá dehálažžan. Logut sis čájehit ahte bussejohtalus Suomas Kárášjoga bokte Davvinjárgii suoidnemánus mearkkaša 85 000 mátkkolačča.
Siida Sámi Musea Anáris addá ovttasbargoliibba mii sáhttá dahkat álbmotmeahcceguovddáža riikkaidgaskasaš ásahussan.
Mátkkoštanealáhusfitnodat ráhkkanuvvo maid dál ceggejuvvot Basevuovdái.
Giella- ja kulturguovddáš Kárášjohkii
Kárášjoga gielda dieđiha ahte sii mearridedje ásahit giellaguovddáža, gielddaplána mielde ja Sámedikki guovttegielatvuođadoarjaga ovttasbargošiehtadusa mielde.
Gielddastivrra mearrádus cealká ahte kulturskuvla galgá oassin giellaguovddážis:
«Gielda lágida giellaguovddáža ásaheami, mii maiddái galgá jođhit kulturskuvlla.» Giellaguovddáš fidne Sámedikkis njuolggodoarjaga maŋŋil golmma jagi álggahanáiggi 2018-2020. Sámedikki dievasčoahkkin cealká Sámedikki sámi giellaguovddážiid strategiijat, ee. ahte «Sámediggi lea beroštuvvon das ahte giellaguovddážiid doaimmain lea čanaštupmi geavaheddjiid dárbbuide ja sávaldagaide. Geavaheaddjit leat geat dagahit aktivitehta, mii fas lasiha sámegiela anu báikkálaččat».
Ovdanbuktet plána
Gielddas loahpahuvvo jahkásaš giellaguovddáža ásahanprošeakta, ja čoahkkimis ovdanbuktojuvvo Kárášjoga Sámi giella- ja kulturguovddáža plána.
