Areálageavaheapmi lea geardduheaddji riidofádda boazodoalus. Dál áigot geahččalit unnidit riidduid.
Areálageavaheapmi lea geardduheaddji riidofádda boazodoalus. Dál áigot geahččalit unnidit riidduid.
Romssa fylkkasuohkan bargagoahtá boazodoalloregionála plánain ja bovde čoahkkimii Romsii guovvamánu 3. beaivvi. Buot Romssa suohkanat leat bovdejuvvon, ja buot 14 orohaga Romssas, lassin dan 12 orohahkii Oarje-Finnmárkkus main leat geasseguohtun Romssa fylkkas ja njeallje Ruoŧa čearu mat guođohit Norgga bealde, čállá Folkebladet.
Geahpedit barggu
Čoahkkimis galgá earret eará sátnejođiheaddji Toralf Heimdal hupmat Beardu suohkana vásáhusaid birra boazodoaluin. Álttesjávrri guovllus leat čađat guohtunriiddut.
Plána- ja ekonomiija fylkkaráđđi, Gerd Kristiansen, čujuha ahte boazoealáhus lea rájatkeahttá, sihke našuvdnarájiid, fylkkarájiid ja suohkanrájiid ektui.
– Oktasaš areálageavaheapmi geahpedivččii dárbbašlaš barggu buot osiide, lohká Kristiansen.
Buohkat berrejit searvat
– Areálariiddut billistit sihke suohkana ja ealáhusa ovdii, ja dávjá lea boađusin buktit garra cealkagiid almmolaččat. Mis lea dáhttu heivehit nu ahte eai galgga leat nu garra riiddut boahtteáiggis, dadjá fylkkaráđđi Kristiansen.
– Jus galgat lihkostuvvat, de fertejit suohkanat ja ealáhus oažžut dohkkehuvvot eatnamiid vai sáhttet viidáset doaibmat ja ovdánahttit. Lea hirbmat dehálaš ahte suohkanpolitihkkarat ja ealáhusat leat mielde dán barggus vuosttaš beaivvi rájes juo. Sidjiide geat servet lea stuora ovdamunni, nu ahte mii jáhkkit oassálastima ja aktiivvalaš doaimma buot beliin, dadjá fylkkaráđđi Kristiansen.
Dan čállá Folkebladet.
