Organisašuvdna mii vuosttalda bieggafápmohuksemiid lea mearridan dán jagi riikačoahkkima doallat Álttás.
Cuoŋománu 27. ja 28. beivviid čoahkkanit miehtá riika bieggafápmovuosttaldeaddjit Áltái, Finnmárkui, organisašuvnna Motvind Norge riikkačoahkkimii.
– Dál lea bárisin áigi lágidit riikačoahkkima Davvi-Norggas. Dohko vigget olu bieggafápmohuksejeaddjit. Ráđđehus dagaha fápmoroasu ja alla elrávdnjehattiid go elektrifiserejit Muolkkuid, ja hohpohit eahpedohkálaččat meannudit stuora bieggafápmorusttega. Olles organisašuvdna áigu dál vuosttaldišgoahtit dán, lohká Motvind Norge stivrajođiheaddji John Fiskvik preassadieđáhusas.
– Finnmárkkus lea stuora vuosteháhku daidda plánaide. Finnmárku lea mannan jagi šaddan regiuvdnan gos Motvind Norge organisašuvnnas leat eanemus miellahtut olmmošlogu ektui. Motvind Norge ovttasbargá orohagaiguin mat sáhttet vahágahttot, ja sidjiide leage gižžu bieggafápmohuksemiid vuostá eksistensiealla, lohká Motvind Norge Finnmárkku jođiheaddji, Tore-Jan Gjerpe.
– Riikačoahkkin šaddá earenoamáš dehálaš arenan hukset ovttasbargguid álbmotjoavkkuid, organisašuvnnaid ja politihkkariid gaskkas geat geahččalit bissehit bieggafápmohuksenplánaid ja gáhttet luonddu. Lea dárbu čohkket fámuid jus galgat vuoitit, lohká Gjerpe.
– Ođđa Álttá-ášši
Go leat válljen Álttá čoahkkinbáikin, de leat maid geahčestan maŋos Álttá-akšuvdnii.
– Álttá-akšuvdna lea dehálaš inspirašuvdnan dáistalemiid mat bohtet dás ovddasguvlui šaddat, vaikko mii sávvat nagodit stuora oasi plánaid bissehit ovdal go rogganmašiinnaiguin bohtet, lohká John Fiskvik.
Sii eai áiggo dušše vuosttaldit bieggafápmohuksemiid, seamma dehálaš lea organisašuvdnii čuvget buoret čovdosiid.
– Mii áigut maid čalmmustahttit mo Finnmárkku ealáhusat sáhttet elfámu oažžut jierpmálaš boahtteáiggeplánaid mielde, vugiid mielde mat eai vahágahte luonddu agibeaivi, lohká Fiskvik vel.
