Orohat 14A bivdá gaskaboddosaš mohtorjohtolatgildosa. Máđidja man bivdet giddet lea bievlageaidnu nummar 9 mii manná Čáskilis Suoidnejávrái.
Porsáŋggu suohkanis lea ipmárdus ahte máđidja berrešii giddejuvvot, muhto ávžžuha maid ahte máđidja rahppo fas jođánit maŋŋel go orohat lea geargan mearkun- ja njuovvanbargguiguin.
Suohkana bievlamáđijain lea stuora ávki álbmogii geat geavahit suohkana meahcceareálaid.
– Suohkan bivdá ahte gaskaboddosaš gidden ii hehtte ealgabivdojoavkkuid mat šiehtadit orohagain johtit máđija mielde go áigot fievrredit bivdoleairra meahccái, čállá suohkan Finnmárkku fylkkamánnii.