Guovttis leaba dál sáhkkohallan Farmen-feastta dihte.
Finnmárkku politiijaguovlu čállá preassadieđáhusas ahte dál leat guoktásiidda addán sáhku Farmen-feastta dihte. Feasta dollui muhtun valáštallansearvvi klubbavisttis guovvamánu 27. beaivvi.
– Daid nationála njuolggadusaid mielde, mat dalle guske, ii lean lohpi siste čađahit priváhta lágidemiid gos leat eambbo go 10 olbmo, cealká politiija Morten Daae preassadieđáhusas.
Feasta lágiduvvui dalle go lei alla njoammunleavvan Norggas, muhto lei unnán njoammun Finnmárkkus. Vaikke oassálastit ledje sihke ovdal ja maŋŋel go bohte Finnmárkui váldán koronaiskosa, de ii lean njuolggadusaid mielde lohpi lágidit feastta.
Valáštallansearvi ja okta olmmoš ožžo 20 000 ruvdnosaš sáhku feastta lágideami dihte ja go leat rihkkon Njoammunsuddjenlága.
Eará feastaoassálastiid áššit leat heaittihuvvon duođaštusaid dihte.
– Mii leat árvvoštallan ášši ja njuolggadusaid, ja eahpidit ahte sáhttit ráŋggáštit oassálastiid nu mo njuolggadusat leat dál. Danne lea ášši sin bealis heaittihuvvon, cealká Daae preassadieđáhusas.
