Sámi beassášmárkaniid lágideaddjit dustet lohpidit viiddis beassášprográmma dán eahpesihkkaris áigodagas.
Vaikke koronavirus ain stajida Norggas ja dagaha eahpesihkarvuođa, de leat Sámi beassášmárkaniid lágideaddjit 50-jagi ávvudeami oktavuođas plánen iešguđet doaluid Guovdageainnus skilleduorastagas 1. beassášbeaivái.
– Juste dál lea dan duohken ahte čavge go ráđđehus njoammunsuddjennjuolggadusaid vai ii, muhto mii eat váldde daid ovddalgihtii. Mii háliidat olbmuide addit buriid beassášvásáhusaid, dadjá lágideaddji Ol-Johan Gaup.
– Šaddet nu go dalle go álge 50 jagi áigi
Lágideaddji muitala sin áigut prográmma almmuhit dán vahkku mielde. Son lohká rehkenastit sullii 100-200 olbmo sáhttit searvat juohke lágideapmái.
– Dán jagáš doalut šaddet nu go dalle go beassášmárkanat álge 50 jagi áigi. Eai leat nu stuora doalut, eaige olusat sáhte čoahkkanit. Muhto mii sávvat ahte sáhttit lágidit dorvvolaš doaluid njoammunsuddjennjuolggadusaid siskkobealde, nu ahte beassat addit olbmuide fiinna beassášvásáhusa, dadjá Ol-Johan Gaup.
Olu olgodoalut
Gaup muitala ahte dán jagáš beassášmárkaniid váldobáiki lea Guovdageainnu gilišillju. Dohko lea Beaivváš Sámi Nationálateáhter ceggen olgolávddi, mas galget čájálmasat čájehuvvot beassášvahkkus. Lávvolávdi galgá ceggejuvvot, gos earret eará Keiino galgá čuojahit. Lávvolávddis galget maid nuoraidkonsearttat, árbevirolaš juoigankonsearttat ja mánáid juoigankonsearta.
– Mis lea áigumuš lágidit fysalaš doaluid, mat eai mana streama bokte. Sámi Grand Prix, mii lea studios ovddalgihtii báddejuvvon, manná streama bokte, ja soaitá árbevirolaš juoigankonsearta maid streamejuvvot, čilge lágideaddji Ol-Johan Gaup.
Lágideaddji maid muitala ahte áigot geahččalit lágidit njorostallamiid ja heargevuodjimiid eanu alde.
