Politiijat dieđihit Twitteris ahte sihke Deanus ja Álttás lea leamaš johtolatdárkkisteapmi.
Deanus, Juovlavuona guovllus, lei gaskavahku eahkeda johtolatdárkkisteapmi.
Golbma biilavuoddji sáhkkohalle go vudje beare leahtuin.
Alimus leahttu mihtiduvvui 110 km/d báikkis gos lea lohpi vuodjit 80 km/d.
Massii vuodjinkoartta
Gaskavahku eahkeda dárkkistedje politiijat johtolaga Álttás maid.
Okta dievdu, badjelaš 20-jahkásaš, massii vuodjinkoartta go vujii 81 km/d báikkis gos alimus leahttomearri lea 50 km/d.
Njeallje eará biilavuoddji maid sáhkkohalle go vudje beare leahtuin.
