Bartaeaiggát dáhtošii vuovdit barttas Gálgojávrris, Omasvuonas. Basevuovddi boazodoaloorohat caggá dán go oaivvildit bartageavaheami hehttehussan ealáhussii.
Muhtin omasvuotnalaš dievdu lea almmuhan bartas vuovdimassii, muhto barta lea boazodoaloguovllus ja danin cakkaha ealáhus vuovdima. Barta lea Basevuovddi orohagas Gálgojávrris Omasvuona suohkanis.
– Barta ferte sirdojuvvot dahje máhcahuvvot guođohanbartan, oaivvildit boazodoallit.
Hehttehussan
iStorfjord.com neahttasiiddu čállá ahte Basevuovddi boazodoaloorohat lea sádden reivve sihke Omasvuona suohkanii ja Romssa fylkkamánnái, reivves ákkastallet ahte bartageavaheapmi sáhttá hehttehussan ealáhussii. Barta Gálgojávregáttis mii lea bivnnut báiki lahka Suomarájá.
– Barta lea hehttehussan go galgat vuojehit ealu Gálgojávrri gárdái mearkun- ja njuovvanáigodaga, čállá orohaga čálli Anna Lisa Båhl reivves.
Dološ sámi oaffarbáiki
Barta huksejuvvui gaskamutto 1900-logu. Dan áigge eai lean áiddit mat doalahedje Suoma ja Norgga bohccuid guovtti bealde rájá, ja danin ledje Lappefogdenis guođoheaddjit geaid várás barta huksejuvvui. Maŋŋel lea muhtin Omasvuona-suohkan váldán badjelasas bartta, boazodoallit eai ožžon fálaldaga oastit bartta.
– 1970-logus registrerii maiddái Romssa musea guovllus dološ sámi oaffarbáikki, danin berre Sámediggi suddjet dán, čállá Båhl teakstadieđus iStorfjord.com:i.
