Odne dievvá áigemearri dieđihit iežas Sámedikki jienastuslohkui jus dáhtu váikkuhit iežas válgabiire áirraslogu. Dasa lassin mearriduvvo odne guđe suohkaniin šaddet sierra válgadikkit.
Odne dievvá áigemearri dieđihit iežas Sámedikki jienastuslohkui jus dáhtu váikkuhit iežas válgabiire áirraslogu. Dasa lassin mearriduvvo odne guđe suohkaniin šaddet sierra válgadikkit.
Vaikke Sámedikkeválggat eai leat ovdal guovtti jagi geahčen, de lea dattege jienasteddjiin vejolašvuohta váikkuhit áirraslogu. Válgabiriid jienastuslogu vuođul oainnat mearriduvvo galle mandáhta juohke válgabiire oažžu Sámediggi maŋŋel válggaid.
– Jus áigu leat fárus váikkuheame áirraslogu, de ferte odne dieđihit iežas jienastuslohkui. Sámediggái lea dieđusge hui dehálaš ahte olbmot leat min duogábealde, go dat legitimere visot, lohká Sámedikki ráđđeaddi Roald Sandvik, geas lea ovddasvástádus válga ja jienastuslogu ovddasvástádus.
Sierra válgadikkit
Sii geat čálihit iežaset Sámedikki jienastuslohkui ovdal gaskaija leat maid mielde váikkuheamen makkár suohkaniin šaddet sierra válgadikkit.
– Sámedikkis leat sierra válgadikkit suohkaniin gos leat unnimusat 30 jienasteaddji. Dát ii leat váttisvuohtan stuora Sámi suohkaniin, muhto mannan válggain oinniimet ahte olu smávva suohkaniin váilo dušše moadde jienasteaddji ovdal báikái livččii ásahuvvot válgadiggi. Suohkaniin gos eai leat válgadikkis šaddet olbmot jienastit ovdalgihtii, čilge Sandvik.
Jienasteaddjit lassánit
Mannan Sámedikki válggaid oktavuođas ledje 15005 olbmo jienastuslogus. Ávjovári válgabiires ledje eanemus jienasteaddjit 2013:s, ja danin ožžo dán guovllus eanemus áirasiid Sámediggái. 39 Sámedikkeáirasis leat gávccis gullevačča Ávjovárrái. Mátta-Sámi ja Viesttarmeara válgabiiriin ledje unnimus jienasteaddjit ja guovlluin ožžo beali unnit áirasiid Sámediggái go Ávjovári válgabiires.
– Mus eai leat ođđaseamos logut, muhto jienastuslogus lassánit olbmot. Mannan válggaid rájes leat sullii 300-400 olbmo dieđihan iežaset jienastuslohkui, ja maŋŋel otná dieđihanáigemeari sávašin goit vel 100 olbmo čálihit iežaset jienastuslohkui, lohká ráđđeaddi Roald Sandvik.
Elektrovnnalaš dieđiheapmi
Juohkehaš guhte atná iežas sápmelažžan ja geas lea sámegiella ruovttugiellan dahje geas leat dahje leamaš váhnemat, áhkut, ádját dahje máttarváhnemat geain lea/lei sámegiella ruovttugiellan, sáhttet dieđihit iežaset Sámedikki jienastuslohkui. Maiddái sii geain váhnemat leamaš Sámedikki jienastuslogus sáhttet gáibidit iežaset jienastuslohkui.
– Buot álkimus lea elektrovnnalaččat iežas dieđihit jienastuslohkui, dalle dárbbašuvvo ID-portála dahje MinID. Muđui sáhttá deavdit skovi ja sáddet dan boasta mielde, muhto de ferte muitit otná dáhtonsteampila sihtat. Dasa lassin sáhttá muhtin Sámedikki kantuvrii doalvut skovi, muhto dan ferte dahkat dan botta go kantuvrrat leat rahpasat. Vejolašvuohta lea maiddá scannet skovi ja sádden dán epoasta bokte midjiide, muitala Sandvik.
Vaikke olmmoš ii dieđit iežas Sámedikki jienastuslohkui odne, de ii dattege masse iežas jienastanvuoigatvuođaid. Jus olmmoš dáhtu jienastit Sámedikki válggain 2017:s, de dievvá dieđihanáigemearri jienastuslohkui easka geassemánu 30. beaivvi 2017:s.
Sámedikki áŋgiruššan video:
