Deanu gieldda sátnejođiheaddji oaivvilda Morten Blienis lea dohkálaš lohpi vuodjit skohteriin Deanu mielde máilmmiolahusgeahččaleami oktavuođas, ja Fylkkamanni ii sáhte gieldit dálá eahpečielga njuolggadusaid mielde.
Deanu gieldda sátnejođiheaddji oaivvilda Morten Blienis lea dohkálaš lohpi vuodjit skohteriin Deanu mielde máilmmiolahusgeahččaleami oktavuođas, ja Fylkkamanni ii sáhte gieldit dálá eahpečielga njuolggadusaid mielde.
Ikte sáddii Finnmárkku Fylkkamánni Birasgáhttenossodat reivve Deanu gildii ja Kárášjoga gildii ahte vuodjinlohpi mii lea addon Morten Blienii, ii leat gustovaš.
Ii leat fanas
Deanu gieldda sátnejođiheaddji Frank Ingilæ oaivvilda Deanu mohtorklubbas, Morten Blien bokte lea dohkálaš lohpi vuodjit skohteriin Deanu čázadaga mielde máilmmiolahus geahččaleami oktavuođas.
– Fylkkamánni lea konsulteren Mearrajohtolatdirektoráhta guhte oaivvilda lohpi ferte meannuduvvot smávvafanaslága njuolggadusaid mielde. Morten Blien galgá vuodjit skohteriin mii ii govddo buori leahtu haga. Skohtera ii sáhte gohčodit fatnasin, skiipan dahje čáhceskohterin mii duođas govdu, čállá Ingilæ preassadieđáhusas.
Mohtorjohtolatlága mielde
Sátnejođiheaddji lea ovttaoaivilis fylkkamánniin ahte njuolggadusat leat eahpečielgasat mii guoská skohteriin vuodjit rabas čázis ja čázádagain.
–Oažžu baicce jearrat sáhttá go gáibiduvvot lohpi obanassiige vuodjimii dan áigodagas go Deanu Mohtorsearvi lea ožžon lobi. Deanu gielddastivra lea gávnnahan ahte ferte atnit paragráfa 6 mohtorjohtolatlágas, danne go lea eanemus relevánta dan erenomáš ohcamuššii. Dan leat mii maid digaštallan Kárášjoga gielddain, guhte maiddái oaivvilda ahte dat lea dat rievttes láhka man vuođul ohcamuš meannuduvvo, čállá Ingilæ.
Ii gieldán eará báikkiin
Deanu sátnejođiheaddji diehtá lea addon lohpi gilvvuide skohteriin rabas čáziin máŋga eará gielddain Finnmárkkus maŋemus 10 jagi, iige leat gullan ahte Fylkkamánni lea geahččalan bissehit daid. Ingilæ vuordá gullat Fylkkamánni čilgehusa makkár láhka galgá ádnot go skohteriin vuodjá rabas čázis.
– Vuorddán ahte Fylkkamánni gohčču politihkalaš njunnošiid departemeanttas čielggadit njuolggadusčállosiid. Erenoamážit danne go dát ášši lea meannuduvvon alimus politihkalaš dásis Deanu gielddas.
*/
Eai lobálaččat
Fylkkamánni Birasgáhttenossodaga áššemeannudeaddji Margareth W. Sundfør muitala sii leat bargame áššiin siskkáldasat, ja ii áiggo dadjat eará ahte sii leat leamaš čielgasat reivves ahte lobit maid Deanu ja Kárášjoga gielda lea addán, eai leat lobálaččat.
– Dát reivve lea maiddái Blienii sáddejuvvon, lohká Sundfør iige dáhto eanet dadjat.
Báhpirat ortnegis
Morten Blien lohká sus leat guokte dokumeantta mat čájehit sus lea lohpi vuodjit, nu ahte son čuovvu daid.
– Mun in leat ožžon eará báhpiriid, ja go maiddái Deanu sátnejođiheaddji lohká mu lobit leat dohkálaččat, de mun vuoján ihttin nu movt plánejuvvon, lohká Morten Blien.