Márkomeannu festivála lea almmuhan odne iđđes vuosttaš artisttanama guhte galgá čuojahit ja lávlut boahtte jagi festiválas.
Márkomeannu festivála lea almmuhan odne iđđes vuosttaš artisttanama guhte galgá čuojahit ja lávlut boahtte jagi festiválas.
Juovlamánus lei ávvu go Ágy beasai šalmmi čađa NRK P3a čuojahanlistui, ja dan maŋŋil vel nammaduvvui dán vahku Urørt-artistan. Suoidnemánus beasat su deaivvadit Márkomeanus.
Ágy lea sámi elektropopartista eret Ráissás. Son lea easkka almmuhan iežas vuosttáš EP, “Arvedávgi”. Son reide elektrovnnalaš musihka mas vel árbevirolaš luohti lea oassin, sihke sámegielat ja dárogielat teavsttaiguin.
Márkomeanu festiválajođiheaddji, Marita Kristin Eilertsen, oaivvilda Ágy lea áivan booken juovlaáigái.
– Ágy reide edgy elektropoppa midjas hiehpá sihke árgabeaivechillii ja festii. Su jietnagovvii gullet hearvás šuoŋat, noaidegoansttalaš ritmmat ja harmonalaš hutkosat, muitala Eilertsen.
Urørt nammasaš prográmma čálii Ágy birra go nammaduvvui dán vahku Urørt-artistan juovlamánu 7. beaivvi: “Ágy seaguha árbevirolaš ja ođđaáigásaš musihka ja darveha oalle buoragit. Ivdnás “Arvedávgi”-EP lea ođasmahtti ja buktá liegga geassedovddu vaikko lea gálbma juovlamánnobeaivi.”
– Márkomeanus lea ulbmil leat lávdi ja vuolggasadji nuorra, sámi artisttaide. Danin leat earenoamáš rápmásat ovdanbuktit Ágy Márkomeanu gussiide, lohká Eilertsen ilolaččat.
Seammás go Márkomeannu luoitá 2016a vuosttaš artistta, rahpá festiválabilleahtavuogdin neahtas.
– Lea perfeakta juovlaattáldat! Ávvudan dihte min vuosttáš bookema, mii fállat hálbbiduvvon festiválapássaid sihke mánáide, nuoraide ja rávisolbmuide, loahpaha Marita Kristin Eilertsen.
Márkomeannu 2016 lágiduvvo suoidnemánu 28.-30. beivviid 2016, festiválabáikkis Gállogieddi Nuortalátti ja Romssa fylkkaráji lahka.
