Badjel 20-jahkásaš Guovdageainnu dievdu áššehuvai áššis mas dáhkádusfitnodat lei váidán dievddu go galggai boasttu dieđuid buktán dáhkádusfitnodahkii biilabuollima oktavuođas.
Badjel 20-jahkásaš Guovdageainnu dievdu áššehuvai áššis mas dáhkádusfitnodat lei váidán dievddu go galggai boasttu dieđuid buktán dáhkádusfitnodahkii biilabuollima oktavuođas.
Guovdageainnu dievddu biila bulii gutnan suoidnemánu 5. beaivvi 2015.
Son lei váldán oktavuođa dáhkádusfitnodagain ja sádden sidjiide gáibádusa buhtadit gálvvuid mat galge leat biillas go bulii.
Gálvvut, mat ledje biillas, galge leat jáhkat, oaggunávdnasat, buksa, oađđenseahkka, olgojáhkka, goikebiergu ja suovasbiergu, niesteseahkka ja viehkanbuvssat.
Oassi dávviriin gávdnojedje barttas
Stuora oassi dávviriin, mat ledje dieđihuvvon buollán, ledje dan dihte gávdnon bearraša barttas mii lea sullii vihtta km eret biilaluottas.
Dáhkádusfitnodat oaččui dieđu borgemánu 28. beaivvi ahte oassi dávviriin lei gávdnon.
Dievdu sáddii ođđa listtu dáhkádusfitnodahkii mas čuoččuhii eanas dávviriid gávdnon, earret ovtta jáhka ja oađđenseahka.
Dáhkádusfitnodat váiddii dievddu politiijaide, go oaivvildedje su leat dieđihan dávviriid mat dattege eai lean buollán ja árvu dávviriin galggai leat 26 925 ruvnno.
Ii mieđihan iežas sivalažžan
Áššáskuhtton dievdu ii mieđihan iežas sivalažžan áššáskuhttinmearrádussii dikkis mii lei skábmamánu 1. beaivvi 2016. Guokte vihttana leigga addán čilgehusa.
Áktor čuoččuhii ahte áššáskuhtton dievdu galgá dubmejuvvot áššáskuhttinmearrádusa vuođul servvodatráŋggáštussii 30 beaivái, dahje giddagassii 24 beaivái.
Áktor čuoččuhii maid áššáskuhtton dievddu máksit áššegoluid.
Dievddu bealušteaddji čuoččuhii áššáskuhtton dievddu áššehuhttot, dahje ahte ii ráŋggáštuvvo garrasit.
Dikki árvvoštallan
Ráŋggáštusáššiin lea áššáskuhttineiseválddiin ovddasvástádus ahte leat duođaštusat daguide maid áššáskuhtton dievdu galgá dahkan.
Politiijat ledje váilevaččat dutkan ášši, eai ge lean duođaštusat čuoččuhusaide.
Diggi čuovvu njuolggadusa mii lea ráŋggáštusáššiin ahte áššáskuhttái galgá doarvái eahpádus mii áššáskuhttái galgá leat buorrin.
Diggi ii loga oaidnit duođaštuvvon ahte dievdu lea dáhtolaččat buktán boasttu dieđuid buollima oktavuođas, mas dávvirat galget buollán gutnan, vai oažžu máksot lassi dáhkádusa. Diggi áššehuhtii dievddu.
