Petter Jahnsen vuittii dán jagi Finnmarksløpet.
Petter Jahnsen vuittii dán jagi Finnmarksløpet.
Hedemárkulaš Petter Jahnsen vuittii dán jagáš Finnmarksløpet 1000 km gilvvu. Jahnsen ollii mollii ovcciin beatnagiin bearjadateahkeda diibmu 20:46. Son ádjánii 93 diimmu ja 37 minuhta Álttás Girkonjárgii ja ruovttoluotta. Jahnsen lea ovddit jagiid máŋgga geardde bártidan gilvvus, earret eará 2004:s go son lei njunnošis, muhto fertii iežas dearvvašvuođa dihte botket gilvvu.
– Daid bárttiid lean visot dál vajálduhttán. Dál lea dušše hávski, logai son Altapostenii maŋŋel go lei mollii ollen. Son oaččui maid lihkkosávaldagaid kulturministaris Linda Hofstadas ja Álttá sátnejođiheaddjis Monica Nielsenis.
Vuittii bartta
Nubbin gilvvus bođii Valdresa vuoddji Marit Beate Kasin, gii ollii 15 minuhta maŋŋel Jahnsena mollii. Son bođii diimmá gilvvus maid nubbin mollii. Vaikko Kasin ii vuoitán gilvvu, de son goitge vuittii 550 000 ruvnno ovddas bartahuksengálvvuid go lea leamaš buoremus vuoddji oktiibuot dan guovtti maŋemus gilvvus.
– Mun ferten leat duhtavaš go šadden nubbin. Mun vudjen garrasit čađat gaskka. Ovdal Joatkka joksen mun Petter Jahnsena ja vudjen meattá, muhto mis nohke fámut, sihke beatnagiin ja mus, lohká son iFinnmark neahttaaviisii.
