Regionhoavda Torbjørn Naimak sávašii dan geasi eai leat biilalihkohisvuođat ja hástá buohkaid várrogasat vuodjit.
Regionhoavda Torbjørn Naimak sávašii dan geasi eai leat biilalihkohisvuođat ja hástá buohkaid várrogasat vuodjit.
Finnmárkkus eai leat vel leamašan jápmimat biilalihkohisvuođain dán jagi, muhto Davvi Norggas leat olles guhtta olbmo juo massán heakka biilalihkohisvuođain dan jagi.
Finnmárkkus eai leat vel leamašan biilalihkohisvuođat mas olbmot leat vádjolan.
Vuollegis logut
– Vaikko dá lea dat unnimus lohku mii lea leamašan Davvi Norggas loahpageahčen vuosttaš jahkebealis, de lea aŋkke okta jápmin, okta jápmin beare olu.
Mii diehtit geassemánnu lea áigodat go eanemus biilalihkohisvuođat dáhpáhuvvet,
ja dan dihte mii ávžžuhit buohkaid vuodjit hui várrogasat geasset, nu ahte buohkat besset vásihit fiinna geasi, muitala regiongeaidnohoavda Torbjørn Naimak.
Romssas leat oktiibuot golmmas duššan biilalihkohisvuođain dán jagi.
Dan seamma leat Nordlánddas. Finnmárkkus ii leat oktage duššan biilalihkohisvuođain.
Luopmo-risiko
Badjelluottavuodjimat ja oktiivuodjimat leat lihkohisvuođat mat dávjjimusat dáhpáhuvvet.
– Ollu trafihka ja seakka ja moalkás geainnut dagahit ahte lea váralaš vuodjit nuppi meaddel. Luopmoáigodat mielddisbuktá ahte oallugat vudjet guhkás ja vudjet amas luottaid. Ale doama ja vuoiŋŋas go lea dárbu, dadjá Naimak.
Hejot páhkkejuvvon gálvu lea okta eará risikofáktor. Lossa ávdnasat galget leat vuolemusas ja geahppa diŋggat bajimusas gálvvus.
Dasa lassin eai galgga leat luovos dávvirat biillas.
Dainna lágiin ii leat nu bahá roasmmohuvvat jus geavvá biilalihkohisvuhtii.
Guovttis massán heakka geassemánus
Badjelvuodjin mielddisbuvttii ahte guovttis mássiiga heakka biilalihkohisvuođas geassemánus.
Lihkohisvuođat dáhpáhuvve Romssa gielddas.
Vuosttaš dáhpáhus lei Hamnas Berg suohkanis.
Das massii okta 53 jahkásaš nisu heakka go vujii badjel geainnu. Son ii lean ieš vuodjime.
Nuppi lihkohisvuođas massii okta 58 jahkásaš dievdu heakka go vujii badjel luotta MC-sykkeliin Sollias Málatvuomis.
