Valáštallandoalut, mat geasuhit lagabui 1000 valáštalli agis 15-25, galget lágiduvvot Álttás.
Dál lea mearriduvvon ahte Barents Winter Games 2022 galgá lágiduvvot Álttás njukčamánu 25.-27. beaivvi.
Sihke dat internationála (Barents Sport Committee) ja nationála (Barents Sport Committee Norway) lávdegottit ledje ovttaoaivilis ahte Áltá galgá lágideami doallogávpogin.
Áltá lágideaddjin ja doallogávpogin
Álttás lea buorre hárjaneapmi lágidit stuora valáštallandoaluid. Maŋemus ledje Norggameašttirgilvvut čuoigamis, cuoŋománu dán jagi. Finnmárkku fylkkagieldda Kultuvrra, álbmotdearvvašvuođa ja johtalusa váldolávdegottijođiheaddji,
Geir Ove Bakken, deattuha Álttá lágideaddjigelbbolašvuođa.
– Áltá lea máŋga jagi bargan bures ráhkadusovdánemiin iežaset suohkanis. Dat buorre bargu lea dagahan Álttá eambbo geasuheaddjin stuorát valáštallandoaluide, sihke nationála ja internationála, čuoččuha váldolávdegottijođiheaddji Geir Ove Bakken preassadieđáhusas.
– Álttá valáštallanbiras lea nagodan háhkat alcceseaset divrras lágideaddjegelbbolašvuođa. Dasa lassin lea dehálaš váldit atnui resurssaid miehtá fylkka, lasiha Bakken.
Váldolávdegotti jođiheaddji sávvá ahte eambbo gávpotsuohkanat Finnmárkkus oidnet geasuheaddji ja buori valáštallanrusttega árvvu iežaset suohkanis.
– Lea gelddolaš čuovvut proseassa lágideami rádjái. Sávan maid lágideddjiide hui olu sihkku plánemiin, loahpaha Geir Ove Bakken.