– Dat go mii ovttas ávvudit beaivvi dás jieŋa alde dahká beaivvi earenoamážin, dajai sámediggeráđđi Hans Ole Eira beaskahasaide, gávttehasaide ja earáide geat šleaŋggahalle Ruogojávrri alde Sámi álbmotbeaivvi. GEAHČA VIDEO ÁŠŠI VUOLIMUSAS.
Guovdageainnu suohkanis eai lean dán jagi oktasaš almmolaš ávvudeamit, muhto Máze gilis gal gullui sihke Sámi soga lávlla ja oidnoje sihke gákte- ja beaskahealmmit šleaŋggahallame jieŋa alde.
Máze doaluid lágidii Máze luistensearvi ja nu go diibmá, de lágidedje dán jagi maid álbmotbeaivvi doaluid luistenšiljus:
– Luistet lea hui somá, mis lea gárvves báiki gos lágidit doaluid, dáppe leat juo dolastallansajit ja čohkkánsajit. Seammás beassat maid lihkadit go ávvudit, mánát besset luistet. Dat leat veaháš earálágán doalut go dábálaččat lávejit Sámi álbmotbeaivvi doalut, gos eanas dušše čohkkájit olbmot, lohká Máze luistensearvvi ovddasteaddji, Marit Kirsten Eira.
Son lasiha vel ahte dieđusge lea korona geažil maid buoremus olgun lágidit dakkár doaluid.
Máret Risten lea čiŋadan gabbabeaskkain ja dan leat máŋggas earát. Lea ge ivdnás joavku mii jorggahallá luistenšiljus, sihke gávttehasat ja beaskahasat. Lágideaddjit ledje ge giktalan gili olbmuid čiŋadit doaluide ja vuorbádedje vuoittu sin gaskkas geain lei gákti dahje beaska alde.
Máret Risten muittuha ahte juste luisten ii leat amas valáštallansuorgi Mázes. Don doloža rájes lea Mázes leamašan luistenberoštupmi. Juste dan jávrre alde gos Sámi álbmotbeaivvi šleaŋggahalle ávvudeaddjit leat dolin gilvalan dološ beakkán luistejeaddjit nu go Eric Heiden ja Fred Anton Maier.
– Somás beavi
8-jahkásaš Risten Elle Márjá Gaup lei maid čiŋadan gávttiin ja luhkain álbmotbeaivvi doaluide. Son lea dollagáttis čohkkádeame go astá veaháš humihit:
Son ii leat nu sihkar mii dat Sámi álbmotbeaivi lea, muhto mieđiha ahte lea earenoamáš beaivi:
– Dat lea min iežamet beaivi.
GEAHČA EAMBBO GOVAID MÁZE ÁVVUDEMIIN DÁN GOVVAGALLERIIJAS:
Son muitala ahte sii leat skuvllas ráhkkanan ja bargan Sámi álbmotbeaivvi fáttáiguin:
– Mii leat ráhkadan leavgga ja lávlon.
Buot suohttaseamos gal su miealas lea leamašan jieŋa alde ovttas olbmáiguin stoahkat ja ávvudit beaivvi.
Máilmmi stuorámus sámi leavga
Lágideaddjit ledje maid málen jieŋa alde dan maid ieža gohčodit máilmmi stuorámus sámi leavgan. Dan leavgga ja lágideddjiid áŋgirvuođa gesii ge Sámedikki ovddateaddji, sámediggeráđđi Hans Ole Eira, ovdan iežan sáhkavuorus.
– Šadden ikte hui rámis go oidne Facebookas ahte Mázes leat ráhkadan máilmmi stuorámus sámi leavgga, nu go ledje čállán.
Eira, gii ieš orru Mázes, rámidii iežas gili olbmuid ja earenoamážit sin geat áŋgirit hutket ja lágidit doaluid gilis:
– Dakkár beaivvit leat mielde muittuheamen midjiide ahte Mázes lea álo sámevuohta leamašan oidnosis ja sávvamis lea boahtteáiggis maid nu. Mis leat olu čeahpes olbmot Mázes geain lea duohta dáhttu ovddit ja nannet Máze servodaga.
Lohpidii
Sámediggeráđđi attii maid lohpádusa iežas giliolbmuide.
Lea olu jagiid leamašan sáhka ásahit Mázii dokumentašuvdnaguovddáža gosa čohkkejuvvojit dieđut Álttá-Guovdageainnučázadaga dulvadeamii birra. Guovddáš ii leat vel nammasuvvon, muhto dan áigu Sámedikki ovttasbargojoavku vuoruhit ja dat lea maid namhuvvon sin ovttasbargojulggaštusas.
– Mii leat lohpidan dan duohtan dahkat ja mun áiggun bealistan bargat maid sáhtán vai dat plánat duohtan dahkkojit, dajai Hans Ole Eira. Son maid ávžžuhii Máze olbmuid veahkkin bargagoahtit dainna ja ásahit sierra joavkku mii dušše dainna bargá, go su vásáhus lea ahte áššit ovdánit jođáneappot go báikkálaš olbmot servet ja leat áŋgirat.
GEAHČA VIDEO DOALUIN JA GULA OLLES SÁMEDIGGERÁĐI SÁHKAVUORU DÁS:
