Mánnodaga, maŋŋel go ohcan áigemearri lea giddejuvvon, de leat 417 bivdojoavkku ohcan bivdoguovllu.
Finnmárkkus leat oktiibuot 295 bivdoguovllu ja daid leat ge dál 417 bivdojoavkku gilvaleamen oažžut.
FeFos ii leat vel gárvvis suohkaniid listu, muhto meahcceossodaga jođiheaddji Einar Asbjørnsen muitala ahte lea lassáneapmi diimmá ektui.
– Diibmá ledje vuollel 400 bivdojoavkku, nu ahte leat lassánan sullii 20 ohcciin. Dán jagi leat sullii 2250 bivdi geat leat ohcan bivddu Finnmárkkuopmodagas, ja dat lea olahus jus ii váldde mielde 2013, go dalle ii dárbbahan beatnaga go ozai bivddu, dadjá Asbjørnsen.
Okta bivdojoavku lea geassádan maŋŋel go álggos ledje ohcan.
