Álttá diggegoddi lea mearridan doalahit ain dievddu rájusgiddagasas hehtten dihte eambbo láhkarihkkumiid.
Álttá diggegoddi lea mearridan doalahit ain dievddu rájusgiddagasas hehtten dihte eambbo láhkarihkkumiid.
Finnmárkku politiijat ožžo duorastaga Álttá diggegottis dohkkehuvvot doalahit 30-jahkásaš dievddu rájusgiddagasas. Dievdu galgá ásaiduvvan Hámmárfestii.
Dievdu lea áššáiduhtton máŋgga ráŋggáštahtti dáhpáhusa ovddas maŋit áiggi, earret eará áššit mat gusket veagalváldimii, áitagiidda, gárrenmirkorihkkosii, ja máŋga johtolatrihkkumii.
Dasa lassin leat vel guokte áššáskuhttinmearrádusa mat gusket veagalváldimii ja leat beaiváduvvon loahpas dán mánu Hámmárfeasta diggegottis.
Geahččalit hehttet
Politiijat válde áššáiduhtton dievddu gitta miessemánu 9. beaivvi čuovganeapmái áitima oktavuođas, Álttás.
Dat ráŋggáštahtti áššit galget dáhpáhuvvan Álttás ja/dahje Hámmárfeasttas ja gáibádus rájusgiddagassii lea ovddiduvvon áššáskuhttineiseválddiin várjalan dihte báikegotti ja hehtten dihte eambbo láhkarihkkumiid.
Sihke Hámmárfeastta ja Álttá politiijat leat maŋemus vahkkuid bargan intensiivvat áššedutkamiin. Politiijat leat duhtavaččat go diggi lea váldán áššáskuhttineiseválddiid gáibádusa vuhtii rájusgiddagasráŋggáštusa ektui.
Áššáiduhtton dievddu bealušteaddji lea advokáhtta Benny Solheim. Go son lei eret, de lei advokáhtta Lene Sandberg su ovddas giddagasčoahkkimis.
