27. geardde viegai Brekke muitun

Lávvordaga lágiduvvui 27. Ingvard Brekke muitoviehkan Kárášjogas. IL Nordlys lea lágidan viehkamiid su muitui 1991 rájes.

Brekke lei áŋgir ovddidit valáštallama Kárášjogas. Son jámii 1990:s.

Viehkan buohkaide

Muitoviehkan lea jurddašuvvan buohkaide, go das lea sihke gilvo- ja lášmmohallanluohkká. Gilvoluohkás váldo áigi, muhto lášmmohallanluohkás ii váldo. Lášmmohallanluohkkái sáhttá sihke sihkkeliin ja vácci searvat.

Viehkamiid jođiheaddji, Doris Norbye, muitala ahte muhtun jagiid leat viehkamat lágiduvvon loahpas cuoŋománu, ja dalle leat muhtumat čuoigan maid.

– Dán jagi manai hui bures, iđđes lei veahá čoaskkis, muhto manai bures. Oasseváldit ledje duhtavaččat, ja mii lágideaddjit leat maid hui duhtavaččat go nissonolbmot serve gilvoluohkkái. Muhtun jagiid eai oba leat ge leamaš nissonolbmot, dál ledje golbma, dat lea hui buorre, lohká Norbye.

(Ášši joatká gova vuolábealde)

22 oasseváldi

Falimus lei Jan Gunnar Tunestvedt Billávuonas eret. Son ádjánii 46 minuhta ja 26 sekundda viehkat 12 kilomehtera.

Falimus nissonolmmoš lei Tove Somby Persen, Kárášjogas eret. Son viegai 58 minuhtas ja 29 sekunddas.

Helge Nordvang lea searvan buot viehkamiidda 1991 rájes. Oktiibuot serve 22 oasseváldi dán jagi.

Jođiheaddji Doris Norbye lei gal sávvan eambbosiid searvat, ja muitala sii áigot boahtte jagi eambbo áŋgiruššat ja juohkit dieđuid viehkamiid birra, vai olusat servet.

– Muhto dál ledje boahtán oasseváldit Billávuonas ja Ullovuonas Romssas, mii lea hui somá, lohká Norbye.

Veahkehanvuoigŋa

Nordbye čilge ahte lášmmohallanluohkás sáhttá vázzit, viehkat ja sihkkelastit, danne vai olusat searvvaše. Muitoviehkamii galgá leahkit álki searvat.

Son muitala maid ahte lea veahkehanvuoigŋa olbmuin, go muhtumat ledje dušše boahtán veahkehit lágidemiin.

– Eat dárbbaš sihtat ge, olbmot gal bohtet veahkehit. Muhtumat ráhkadit sáftta, muhtumat váldet áiggi, earát fas merkejit láhtu, rámida son.