Guovdageainnu suohkan juohká juohke jagi valáštallanstipeandda valáštallái gii ánssáša dán. Dán jagi oaččui sisbandyspealli dan.
Guovdageainnu suohkan juohká juohke jagi valáštallanstipeandda valáštallái gii ánssáša dán. Dán jagi oaččui sisbandyspealli dan.
Bearjadaga geigii Guovdageainnu suohkan valáštallanstipeandda Nilut Cup oktavuođas. Sii leat válljen valáštalli gii lea olahan buriid bohtosiid, ovddida Guovdageainnu ja geas lea mihttu maid áigu olahit.
16-jahkásaš sisbandyspealli
Nils Olaf Eira Hætta lea 16-jahkásaš Guovdageainnu bárdni, geasa suohkan geigii dán jagáš stipeandda.
– Hui somá oažžut dán stipeandda. Dát movttiidahttá ain joatkit hárjehallamiin ja olahit buriid bohtosiid, lohká son.
Hárjehallan garrasit
Nils Olaf hárjehallá sisbandy ja čiekčá spáppa, mii dagaha ahte sus gártá olu hárjehallan vahkkui. Sisbandy lea hárjehallan vihtta jagi, ja lea juoga mainna áigu joatkit. Ii leat álo leamaš liikká buorre, muhto ii leat vuollánan.
– Go álgen, de gal in lean beare čeahppi. Aŋkke jotken hárjehallat, ja das lei ávki. Dás lea vel eambbo mokta joatkit hárjehallat garrasit.
Barents Winter Games Ruoššas
Dán jagi lágiduvvui Barents Winter Games Ruoššas, masa Norga lei čohkken spelliid. Okta sis lei Nils Olaf.
Norga ja Nils Olaf birgejedje bures Ruoššas, ja bohte ruoktot goalmmát sajin.
Mihttu beassat riikajovkui
Go galgá olahit guhkás juogalágan valáštallansuorggis, de lea dehálaš bidjat alcces plána. Nu lea ge Nils Olaf dahkan.
– Áiggun joatkit hárjehallat olu ja garrasit. Mihttu lea dieđusge beassat sisbandy elihtajovkui, ja su dan áiggun olahit, de ferten hárjehallat olu ja garrasit, loahpaha Nils Olaf Eira Hætta.
