– Lea erenoamáš dilli masa leat šaddan koronadávdda dihte, ja lea illudahtti dieđihit ahte Ymbera stivra lea mearridan vuolidit neahttaláiggu, lohká Ymbera hálddašeaddji direktevra Erling S. Martinsen.
Cuoŋománu 1.beaivvi rájes vuoliduvvo neahttaláigu ovcciin evrriin juohke kWh ovddas, dieđiha Ymber sin neahttasiiddus. Oktiibuot gártá Ymberii dát vuolideapmi 21 miljovnna ruvnno 2020 ovddas, ja vuosttaš oassi sihkasteamis lea jo oassin rehkegis mii lea cuoŋománu ovddas.
Mannan jagi loahpageahčen lei Ymberis badjebáza ja dat lea duogáš manin neahttaláigu vuoliduvvui jahkemolsašumis. Ymber háliida sin kundariid diehtit man olu neahttaláigu lea ja plána lea unnidit neahttaláiggu siivvožit moatti jagi badjel.
Dál go korona njoammugolgodávda lea leavvan Norggas, de lea Ymbera stivra mearridan unnidit neahttaláiggu árabut ja vel eanet go dat mii lei plánejuvvon dán jagi.
– Go máksit ruovttoluotta dietnasa min kundariidda dál 2020:s, de sáhttit leat mielde geahpideame dan ekonomalaš noađi min neahttakundariidda, lohká Ymbera stivrrajođiheaddji Gunn Andersen.
– Mii sávvat ahte vuolideapmi lea ávkkálaš buot min priváhtakundariidda ja maiddái min ealáhuskundariidda Ymbera doaibmaguovllus, lohká son.
