Ailu Valle ja Wimme čuojaheaba BeskánLuossaRock festiválas mii lea suoidnemánus Kárášjogas.
Ailu Valle ja Wimme čuojaheaba BeskánLuossaRock festiválas mii lea suoidnemánus Kárášjogas.
BeskánLuossaRock lágiduvvo goalmmádassii, suoidnemánu nuppi beaivvi Beskenjárgga gilážis, guokte miilla eret Kárášjoga gilis. Luossa ja rock lea festivála sisdoallu gos beaivet leat bearašdoalut; luossagilvu rávisolbmuide ja oaggungilvu mánáide.
Wimme boahtá
Musihkkaoassái eahkedii leat juo muhtin artisttat dál almmuhanmuttus. Suomabeale Sámis boahtiba Wimme ja Ailu Valle. Wimme lea dovddus artista miehtá Sámi leamašan juo máŋgalogi jagi. Erenoamáš vásáhussan šattai su ja Hedningarna musihkkajoavkku oktasaš konsearta Riddu Riđus sidjiide geat ledje doppe. Wimme eanemus rámiduvvon cd-skearru doalvvui su olu konseartamátkkiide miehtá máilmmi, muhto min guovllus son ii leat guhkes áigái fitnan.
Ailu Valle čuojaha hip-hop
Gámasmohkkilaš nuorra almmái Ailu Valle boahtá ođđaáigásaš hip-hop musihkain. Politihkalaš teavsttat dan dehálašvuođa luonddu ja sámi eallinvuogi gáhttemis leat dovdomearkan. Iežas musihkka lea ge su dolvon miehtá Eurohpá, ja son rámiduvvo maid olu su lávdeshowaid dihte.
