Badjel bealli jienain leat lohkkon ja Bargiidbellodaga presideantaevttohasas Ronny Wilhelmsen lea loktánan mokta.
Badjel bealli jienain leat lohkkon ja Bargiidbellodaga presideantaevttohasas Ronny Wilhelmsen lea loktánan mokta.
Wilhelmsena vuosttaš kommentára válgaprognosaide lei ahte son ii leat duđavaš. Dál leat eambbo jienat lohkkon, ja Wilhelmsenis lea eambbo doaivva ahte dát sáhttá jorggihit.
Jođus bajás
Vaikko Bargiidbellodat lea arvat maŋŋelis NSR, de ii leat Wilhelmsen massán doaivaga.
– Juste dál mis lea 16,9 % ja leat jođus bajás ain, mii lea hui buorre.
Wilhelmsen rámida iežas bellodaga, ja oaivvilda bargan buori barggu.
– Mu mielas lea Bargiidbellodat bargan máilmmi buori barggu, lean hirpmahuvvan. Vaikko lea leamaš veahá nuo ja ná ovtta gaskka, de mii leat ožžon buriid ruovttoluottadieđuid. Leat jođus bajás, nu go válgaprognosat čájehit, dadjá son.
Ii leat vel mihkke čielgan
Vaikko dán rádjái eai leat lihkostuvvan oažžut eanemus jienaid, de ii namut Wilhelmsen makkárge siva manne nu lea.
– Lehpet go maide bargan boastut go ná manná?
– In ane dán boasttuvuohtan min bealis, vástida son.
Ain doaivva
Dál leat vel olu jienat mat eai leat lohkkon, mii addá ain doaivaga Wilhelmsenii.
– Mis lea ain doaivva ahte manná liikká bures go 2013:s, loahpaha Bargiidbellodaga presideantaevttohas, Ronny Wilhelmsen. gii lea fárrolaga Álttá AUF nuoraiguin Huset báikkis leat leamaš vuossárgga eahkeda.
