Máilmmi dearvvašvuođaorganisašuvdna WHO dohkkehii globála doaibmaplána eamiálbmogiid dearvvašvuođas. Suoma beale Sámediggi oassálasttii čoahkkimis.
Suoma beale Sámedikki sosiála- ja dearvvašvuođačálli Anne Länsman-Magga oassálasttii dan čoahkkimis Geneves. Sámedikki ságajođiheaddji Tuomas Aslak Juuso čilge ahte lea deaŧalaš duohtan dahkat sosiála- ja dearvvašvuođabálvalusaid.
– Dearvvašvuođa ovddideami áššiin galgá guovddážis leat eamiálbmogiid vejolašvuohta oassálastit mearrádusbargui. Dál álggahuvvon bargu máilmmi dearvvašvuođaorganisašuvnnas addá ođđalágan vejolašvuođa giddet fuopmášumi ON:id eamiálbmogajulggaštusa duohtan dahkamii sosiála- ja dearvvašvuođabálvalusain, lohká Juuso preassadieđáhusa bakte.
Vuosttaš geardde
Lei Sámedikki sosiála- ja dearvvašvuođačálli Anne Länsman-Magga gii lei WHO dearvvašvuođačoahkkimis Geneves.
– Lea dehálaš ahte Suoma beale Sámediggi oassálasttii WHO dearvvašvuođačoahkkimis ovttas Suoma delegašuvnnain. Lea vuosttas geardde go leimmet čoahkkimis, dadjá Sámedikki sosiála- ja dearvvašvuođačálli Anne Länsman-Magga.
Suomas lei sáhkavuorru čoahkkimis gos deattuhedje mot leat ovdánan bálvalusain mii guoská gielaide ja kultuvrra dássái.
– Suopma maiddái deattuhii sáhkavuorus, ahte eamiálbmogiid galgá váldit mielde mearrádusbargui ja ságastallamii ja ahte eanet ovttasbargu eamiálbmogiid gaskkas dárbbašuvvo, čállá Suoma beale Sámediggi preassadieđáhusa bakte.
