Garra dálki mii lea dieđihuvvon ollet lulli-Norgii odne eahket, lea ožžon nama «Urd».
Garra dálki mii lea dieđihuvvon ollet lulli-Norgii odne eahket, lea ožžon nama «Urd».
Oarje-Norga lea gearggus dustet garra dálkki Urd, muhto dálki ii leat vel ollen gátti lahka vel. Dálkedieđiheaddji attii dálkái nama sotnabeaivvi, muhto dálki olle easka mánnodaga maŋŋelgaskabeaivvi Oarje-Norgii.
Biegga sáhttá bosádit 35-45 mehtera sekunddas, ja lulimus mearragáttiin Lindesnes bokte gitta Stadii, sáhttet bárut leat 12 mehtera alladat. Soames bárut soitet badjel 20 mehtera alladat.
Váldogádjunguovddáš vároha olbmuid dain alla várálaš báruin.
Giddejit luottaid ja šalddiid
Dál soitet giddet luottaid váriid badjel, ja soitet giddet šalddiid maid. Fatnasat maid fertejit bisánit gáddegurrii. Politiijat ja eará heahteveahkit geat vurdet dálkki ollet, ávžžuhit olbmuid gárrat gitta luovosdávviriid.
Davvi-Norgii ii dovdo dálki nu garrasit
Nordlándii boahtá dálki dovdot, muhto ii nu garrasit go Oarje-Norggas. Romssa ja Finnmárkku fylkkaide ii olle Urd dálki.
Dálki mii oaččui nama Finnmárkkus maŋemus lei «Jorun», mii bođii njukčamánu 8.beaivvi 2014.
