-Almmuhus-
-Almmuhus-
OĐĐASATVurdet unnit olgoriikka oagguid Finnmárkui

Vurdet unnit olgoriikka oagguid Finnmárkui

-

-

Dál lea gearggus vuosttaš oaggunáigodahkii go lea orrungáibádus Norggas vai beassá oaggut Finnmárkkus.   

FeFo lea sádden preassadieđáhusa olgoriikalaččaid birra geat áigot oaggut Finnmárkkus. 

– Vaikko leat ollu olgoriikkalaččat geat ohcet ja ožžot sierralobi garvin dihte orrungáibádusa, de mearkkaša orrungáibádus ahte dán jagi eai leat lahka ge nu ollu olgoriikalaččat geat bohtet Finnmárkui oaggut go ovddit jagiid, dadjá FeFo meahcceossodaga jođiheaddji Einar J. Asbjørnsen preassadieđáhusas. 

 

119 ohcama

FeFo stivra mearridii skábmamánu 28. beaivvi 2018:s ásahit orrungáibádusa Norggas buohkaide geat áigot oaggut Finnmárkkus gaskal njukčamánu 15. beaivvi ja geassemánu 15. beaivvi.

FeFo stivra lea rahpan vejolašvuođa addit sierralobiid oagguide, muhto mátkeealáhusfitnodagain galggašii leat vuosttašriekti sierralobiide. 

Njukčamánu 4. beaivvi rádjái lea FeFo ožžon 84 ohcama ovttaskasolbmuin ja 35 ohcama mátkeealáhusfitnodagain.

FeFo lea meannudan 60 ovttaskasolbmo ohcama ja 58 dain leat dohkkehuvvon. Nu leat 82 olbmo ožžon sierralobi.

FeFo lea maid meannudan buot ohcamiid matkeealáhusfitnodagain ja sis leat 32:s ožžon sierralobiid. 

 

Eanemus Deanus ja Davvesiiddas

Áigodat masa sierralobit leat addon lea gaskal 4 beaivvi ja olles áigodaga, ja gaskamearálaččat 31 beaivvi.

Eanas sis geat leat ohcan sierralobiid oanehit áigái leat ohcan daid cuoŋománus ja miessemánu álggus.

Guovllut gosa eanemus sierralobit leat ohccon leat Deanu ja Davvesiidda gielddain.

Muđui leat maid ohccon lobit Unjárggas, Báhcavuonas, Bearalvágis, Mátta-Várjjagis, Kárášjogas, Porsáŋggus ja muđui Várnjárggas. 

Diibmá vuvdojedje seamma áigodagas 2043 oaggunkoartta olgoriikalaččaide, ja dat lea mealgat eambbo go dan maid dán jagi vuordit. 

– Ordnega ulbmil lea doarjut báikkálaš mátkeealáhusaid ja mii illudit oaidnit makkár váikkuhusaid dát ortnet buktá Finnmárkku álbmogii, loahpaha Asbjørnsen. 

-Almmuhus-