Norggabeale eiseválddit hoahpuhit ruoŧabeale eiseválddiid dahkat mearrádus Norgga-Ruoŧa boazoguohtunsoahpamuša áššis.
Norggabeale eiseválddit hoahpuhit ruoŧabeale eiseválddiid dahkat mearrádus Norgga-Ruoŧa boazoguohtunsoahpamuša áššis.
Davvi-riikkaid ministtaráđi oktavuođas, mii lei Suomas geassemánu 30. beaivvi, digaštalaiga norgga eanandoallo- ja biebmoministtar Jon Georg Dale ja ruoŧa eanandoalloministtar Sven-Erik Bucht mo ođđa Norgga-Ruoŧa boazoguohtunsoahpamuša ratifiserenbargu galgá ovdánit.
– Mun oainnán ahte mu ruoŧabeale bargoustit čielgasit ovddida ahte háliidan gávdnat čovdosa ođđa soahpamuššii ja ahte dat ferte jođánit dáhpáhuvvat, lohká Dale preassadieđáhusastis.
Hoahppu šaddagoahtán
Ruoŧa beale leat ovddidan ahte dárbbašit vuđoleappot guorahallat earret eará makkár riektesihkkarvuođa evttohuvvon soahpamuš attášii. Das lea dahkkon guorahallan mii dál sáddejuvvo gulaskuddamii.
Dán barggu vuođul áigot ruoŧabeale eiseválddit mearridit maid oaivvildit viidásat barggu birra, dat galgá dáhpáhuvvat dán jagis.
Eanandoallo- ja biebmoministtar Jon Georg Dale lohká dál leat hoahppun.
– Lea hirbmat guhká ádjánan ráhkadit ođđa norgga-ruoŧa guohtunsoahpamuša. Vuođđu lei gárvvis jo 2009:s. Dálá eahpesihkkaris dilli lea vahágiin sihke ruoŧa- ja norggabeale boazodolliide, lohká Dale.
Ovddit soahpamuš nogai 2005:s
Norga ja Ruoŧŧa leat guhká bargan oččodit ođđa guohtunsoahpamuša, dan rájes go ovddit soahpamuš nogai 2005:s, 11 jagi dassái.
Ođđajagimánus lei eanandoalloministariin Dales ja Buchtas fas čoahkkin ášši birra.
Čoahkkimis dieđihedje ruoŧabeale eiseválddit ahte áigo álggahit guorahallama soahpamuša birra. Dáinna leat dál geargan, danin vurdet ge norggabeale eiseválddit mo Ruoŧŧa viidásat čuovvola guorahallama.
