Duorastat eahkeda lei almmolaš rahpan dán jagáš Riddu Riđđu álgoálbmotfestiválas ja jođiheaddji Karoline Trollvik ii loga ovddit jagiid leamaš ná ollu olbmuid rahpamis.
Duorastat eahkeda lei almmolaš rahpan dán jagáš Riddu Riđđu álgoálbmotfestiválas ja jođiheaddji Karoline Trollvik ii loga ovddit jagiid leamaš ná ollu olbmuid rahpamis.
Almmolaš rahpan lei váldolávddis beal čieža áigge eahkedis ja moadde minuhtta ovdal eai leango moaddelogis čoahkkanan lávddi ovdii.
Beaivváš jur hirpmáhuhtii
Beaivvadat ja lieggaceahkit, mat eai leat dihtton dán geasi movttiidahtte olbmuid ja go konsearta bođii albma láhkai johtui, šávihedje máŋga čuođis festiválabáikái ja álge veahážii mielde dánsut erenomáš musihkkii.
– Lihkus šattai fiinna dálki ja measta jo hirpmástuhtii, go lei dieđihan čoaska dálkki. Buot dán rádjái lea mannan buorebut go ledjen vuordán.
Nu dadjá Karoline Trollvik, gii vuosttaš háve jođiha festivála.
Dánso johtui festivála
Doalut dánsejuvvojedje johtui Canada álgoálbmot joavkkus Tribal Visionis ja sin maŋŋel presenterejuvvui «bestillingsverket», dahje sámegillii diŋgojuvvon duodji, mas Arvvas ja Chirgilchin čuojahedje sáme-, eaŋgalas- ja ruoššagillii. Dasa lassin čuojahedje Mingá ja F.A.C.E loahpaeahkeda.
GEHČA VIDEO DÁS VUOLLELIS!
Máilmmi buoremus
Jođiheaddji rámida iežas buot bargovehkiid ja deattuha ahte sin haga ii livčče vejolaš lágidit ná buori festivála.
– Dákkár joavkkuin lea álki leat festiválajođiheaddjin go lea mu vuosttaš jahki. Leat hárjánan bargit ja čeahpes olbmot joavkkuin. Dovddan ahte lean hui ráfálaš ja olbmot leat maiddái vuohttán dan. Dat lea danin go buot manná nu go galgá ja mus lea máilmmi buoremus bargojoavku, deattuha son.
Trollvik muitala sin maiddái vuovdán eanet ovddalgihtii bileahtaid go dábálaččat ja sávvá dán jagáš doaluid šaddat sukseassan.
Olmmoš dieđus ii duostta bearehaga jáhkkit ja lea beare árrat dadjat maidige, muhto sávvat lea lohpi ahte nagodit bidjat galledeaddji olahusa dán jagi, dadjá son.
